Xalqaro valyuta jamg'armasining (XVJ) so'nggi hisobotlariga ko'ra, joriy yilda Bangladeshda aholi jon boshiga to'g'ri keladigan yalpi ichki mahsulot hajmi mintaqadagi yirik iqtisodiyotlardan biri bo'lgan Hindistondan yuqori bo'lishi kutilmoqda. Garchi Hindiston iqtisodiyoti umumiy hajm jihatidan qo'shni davlatnikidan qariyb sakkiz barobar katta bo'lsa-da, aholi sonining ko'pligi sababli jon boshiga to'g'ri keladigan ko'rsatkich boshqacha manzarani namoyon etmoqda. 175 million aholiga ega Bangladeshda 2026-yilgi jon boshiga YaIM miqdori 2,886 dollarni tashkil etishi taxmin qilinayotgan bir paytda, Hindistonda bu ko'rsatkich 2,749 dollarga teng bo'lishi aytilmoqda.
Mutaxassislarning fikricha, mamlakatdagi mazkur iqtisodiy o'sish asosan 38 milliard dollarlik tayyor kiyim-kechak sanoati, chet ellardan kelayotgan pul o'tkazmalari hamda ayollarning mehnat bozoridagi faolligi oshgani bilan bog'liq. Shu bilan birga, so'nggi yillarda yuqori inflyatsiya darajasi va o'sish sur'atlarining sekinlashishi ushbu iqtisodiy muvaffaqiyatlarga jiddiy bosim o'tkazmoqda. Xususan, Hindiston iqtisodiyoti joriy yilda 7 foizga o'sishi kutilayotgan bir paytda, Bangladeshda bu ko'rsatkich atigi 3.6 foizni tashkil etishi taxmin qilinmoqda.
XVJ ma'lumotlariga ko'ra, xarid qobiliyati pariteti (XQP) bo'yicha hisoblanganda vaziyat o'zgaradi va Hindiston aholisi yuqoriroq xarid qobiliyatiga egaligi ma'lum bo'ladi. XQP bo'yicha Hindistonda jon boshiga YaIM 12,998 dollarni tashkil etsa, Bangladeshda bu ko'rsatkich 10,884 dollarni tashkil qiladi. Qolaversa, Hindistonda iste'mol narxlari inflyatsiyasi 5 foiz atrofida baholanayotgan bo'lsa, Bangladeshda bu ko'rsatkich 8.7 foizga yetib, aholining yashash sharoitlariga og'ir yuk bo'lmoqda.
Tahlilchilarning ta'kidlashicha, Bangladesh iqtisodiyoti asosan eksportga yo'naltirilgan ishlab chiqarishga tayangan bo'lib, energiya resurslari va logistika zanjirlaridagi global tebranishlarga juda moyil. Xususan, mamlakat o'z neft va suyultirilgan gazining 95 foizini chetdan, asosan Yaqin Sharqdan sotib oladi. AQSh va Isroil rejimining Eronga qarshi harakatlari hamda Hormuz bo'g'ozidagi dengiz qatnovining izdan chiqishi Bangladesh energetikasi va eksport yo'laklariga, jumladan, eksport daromadlarining 80 foizidan ortig'ini ta'minlovchi tikuvchilik sanoatiga jiddiy zarar yetkazmoqda.
Source: www.aljazeera.com