️ «Hududgaztaʼminot» aksiyadorlik jamiyatining komplayens nazorat tuzilmalari tomonidan mamlakatimizda suyultirilgan gaz taqsimoti va uning talon-toroj qilinishining oldini olish borasida keng ko‘lamli tezkor reyd tadbirlari amalga oshirildi. Maʼlum qilinishicha, 2025-yil hamda 2026-yilning dastlabki to‘qqiz oyi davomida o‘tkazilgan uch mingdan ortiq to‘satdan tekshiruvlar natijasida jami 1 ming 217 ta jiddiy qoidabuzarlik holatlari fosh etilgan.

️ Olib borilgan o‘rganishlar davomida suyultirilgan gazni yashirin ravishda sotishga ixtisoslashgan 471 ta shubhali «bunker» aniqlanib, ularning noqonuniy faoliyatiga qatʼiy chek qo‘yildi. Masʼul idoralarning maʼlumotlariga ko‘ra, ko‘rilgan tezkor choralar natijasida qiymati qariyb 2 milliard so‘mlik 193,6 tonna suyultirilgan gaz hamda umumiy qiymati 8,7 milliard so‘mlik 17 ming 301 dona maishiy gaz ballonlarining noqonuniy realizatsiya qilinishining oldi olingan.

️ Shuningdek, 2026-yilning o‘tgan to‘qqiz oyi mobaynida o‘tkazilgan xizmat tekshiruvlari jarayonida 1,4 ming tonna suyultirilgan gaz va 10 ming 626 dona maishiy gaz ballonlari talon-toroj qilingani aniqlangan. Aniqlangan qoidabuzarliklarga qonuniy baho berish hamda aybdor shaxslarni javobgarlikka tortish maqsadida 25 ta to‘plamdagi materiallar huquqni muhofaza qiluvchi organlarga yuborilib, ular asosida 19 ta jinoyat ishi qo‘zg‘atilgani maʼlum qilindi.

️ Hozirgi vaqtda komplayens nazorat tuzilmalari tomonidan bunday huquqbuzarliklarga qarshi kurashish bo‘yicha to‘satdan o‘tkaziladigan tekshiruvlar va reydlar izchil davom ettirilmoqda. Mutasaddilar aniqlanayotgan kamchiliklarning kelib chiqish sabablarini chuqur o‘rganib, ularning takrorlanishiga yo‘l qo‘ymaslik choralarini ko‘rmoqdalar. Shuningdek, fuqarolardan suyultirilgan gazni noqonuniy sotish yoki boshqa suiisteʼmollik holatlariga duch kelganda maxsus +998 71 202-11-04 yoki qisqa 1104 raqamlari orqali xabar berishlari so‘ralmoqda.

Source: kun.uz