Isroil rejimi kuchlarining Gazo sektoriga uyushtirgan navbatdagi qaqshatqich zarbalari oqibatida kamida yetti nafar falastinlik halok bo'ldi. Ma'lum qilinishicha, hujumlardan biri Gazo shahridagi Islom universiteti kampusiga qaratilgan bo'lib, uning oqibatida uch nafar qo'riqchi hayotdan ko'z yumgan. Bu mazkur ta'lim muassasasiga bir necha soat ichida uyushtirilgan ikkinchi hujum ekani aytilmoqda.

Hodisa joyidan xabar bergan muxbirlarning so'zlariga ko'ra, portlash oqibatlari juda og'ir bo'lib, vayronalar ostida qolgan binolar va halok bo'lganlarning qoldiqlari dahshatli manzarani hosil qilgan. Bundan oldinroq amalga oshirilgan dron hujumida esa yetti nafar talaba qiz turli darajada tan jarohati olgan edi. Ulardan birining ahvoli o'ta og'ir ekanligi va dala gospitaliga yotqizilgani xabar qilindi.

Shuningdek, Gazo sektorining janubiy va markaziy qismlarida ham harbiy harakatlar davom etgani qayd etildi. Xon Yunisdagi al-Mavasi hududida o'qqa tutilishi oqibatida ikki kishi halok bo'lgan, Deir el-Balah sharqida esa yana bir fuqaro dron zarbasidan qurbon bo'lgan. Falastinning Wafa axborot agentligi shimoliy hududlarda ham qurbonlar va yaradorlar borligini ma'lum qildi.

BMTning ta'lim, fan va madaniyat masalalari bo'yicha tashkiloti (UNESCO) ma'lumotlariga ko'ra, 2023 yil oktabr oyidan beri Gazo sektoridagi OTMlarning qariyb 95 foizi vayron qilingan yoki jiddiy shikastlangan. Mutaxassislar bu kabi holatlar mintaqadagi ta'lim tizimini butunlay izdan chiqarayotganini ta'kidlashmoqda.

Rasmiy ma'lumotlarga ko'ra, mojaro boshlanganidan buyon halok bo'lganlarning umumiy soni o'n minglab kishilardan iborat bo'lib, hududning katta qismi Isroil rejimining harbiy nazorati ostida qolmoqda. Qamal va cheklovlar fonida mahalliy aholi keskin oziq-ovqat tanqisligi va gumanitar inqirozga duch kelmoqda.

Source: www.aljazeera.com