AQSh Federal sudi sudyasi Jesse Furman dushanba kuni sobiq federal prokuror Morin Komining AQSh rejimining harakatlari natijasida noqonuniy ravishda ishdan bo'shatilganini ma'lum qildi. Uning ta'kidlashicha, Vashingtondagi amaldorlar «quyi darajadagi xodimlarni» asosli sabablarsiz lavozimidan ozod qilish orqali ijro etuvchi hokimiyat vakolatlarini suiiste'mol qilgan va mamlakat konstitutsiyaviy muvozanatiga putur etkazgan. Sudya rejim vakillari tomonidan ilgari surilgan keng qamrovli va bahsli ijro etuvchi vakolatlar nazariyasini keskin rad etdi.

Ishdan bo'shatilgan prokurorning huquqshunoslari ushbu qaror uning otasi, Federal qidiruv byurosining sobiq direktori Jeyms Komiga nisbatan siyosiy adovat tufayli sodir etilganini iddao qilishdi. Sudya Furman Morin Komining davlat xizmatidan siyosiy sabablarga ko'ra bo'shatilishiga yo'l qo'yilmasligini ta'kidlab, unga ishdan bo'shatilgan kundan boshlab o'tgan davr uchun oylik maoshini to'lab berish va vaqtincha lavozimiga qayta tiklash majburiyatini yukladi. AQSh rejimi esa ushbu qarordan noroziligini bildirib, uni apellyatsiya tartibida shikoyat qilishini ma'lum qildi.

Morin Komi o'z faoliyati davomida Jeffri Epshteyn va Shon «Diddi» Combs kabi shaxslarga qarshi yuqori profilga ega ishlarni olib borgan tajribali prokuror bo'lgan. Ikkinchi muddatga qaytgan AQSh rahbariyati esa federal apparat hajmini qisqartirish hamda o'z siyosatiga qarshi chiqqan tergovchilarni chetlatish siyosatini davom ettirmoqda. Mutaxassislar ushbu holat Amerika siyosiy tizimidagi chuqur ziddiyatlar va hokimiyat uchun kurashning navbatdagi ko'rinishi ekanini ta'kidlashmoqda.

Source: www.aljazeera.com