Iordaniya harbiy-havo kuchlari Suriya janubi-sharqidagi «terrorchi guruhlar uyalari» deb atalgan hududlarga qaqshatqich havo hujumlari uyushtirdi. Amman rasmiylarining ta’kidlashicha, mazkur operatsiya o‘tgan haftada qirollikdagi pravoslav cherkoviga uyushtirilgan qonli teraktga aloqador shaxslarni yo‘q qilish maqsadida amalga oshirilgan. Iordaniya Qurolli kuchlari bir qator nishonlar vayron qilinganini, ko‘plab jangarilar yo‘q qilinganini va ularning texnikalari yo‘q qilinganini bildirdi. Shuningdek, operatsiya go‘yoki Damashq bilan kelishilgan holda o‘tkazilgani iddao qilindi.

Biroq Suriya tomoni Iordaniyaning ushbu bayonotini keskin rad etib, aviazarbalar hech qanday oldindan ogohlantirishsiz yoki muvofiqlashtirishsiz amalga oshirilganini ma’lum qildi. Suriya Tashqi ishlar vazirligi bu harakatni xoinona tajovuz deb atab, mamlakat suvereniteti qo‘pol ravishda buzilganini qayd etdi. Mahalliy ma’lumotlarga ko‘ra, Deraa va As-Suvayda viloyatlaridagi to‘rtta nuqtaga berilgan havo zarbalari oqibatida kamida yetti nafar fuqaro, jumladan, uch nafar begunoh bola halok bo‘lgan, bir nechta xonadon butunlay vayronaga aylangan.

Hududdagi vaziyat keskinlashuvi ortidan Suriya bojxona xizmati Iordaniya bilan chegaradagi yagona yo‘lovchi va savdo yo‘lagi bo‘lgan «Nassib» nazorat-o‘tkazish punktini noma’lum muddatga yopdi. Fuqarolik mudofaasi xizmatlari al-Taff qishlog‘idagi chodirga berilgan zarba oqibatida bitta oilaning besh a’zosi qurbon bo‘lganini, qutqaruvchilar vayronalar ostidan jasadlarni olib chiqishda davom etayotganini xabar qildi.

Iordaniya so‘nggi yillarda chegaradosh hududlarda qurol va giyohvand moddalar kontrabandasiga qarshi kurash bahonasida Suriya hududiga muntazam ravishda zarbalar berib kelmoqda. Biroq xalqaro inson huquqlari tashkilotlari, jumladan Human Rights Watch, Ammanning bu kabi harbiy amaliyotlari oqibatida muntazam ravishda tinch aholi vakillari qurbon bo‘layotganini ta’kidlab, ushbu holatlar yuzasidan xalqaro tekshiruv o‘tkazishni talab qilgan.

Source: www.aljazeera.com