Surxondaryo viloyatining Uzun tumanida 17 va 20 yoshli ikki yigit haydovchilik guvohnomasiga ega bo‘lmagan holda avtomobillarda poyga uyushtirib, og‘ir yo‘l-transport hodisasiga sabab bo‘ldi.

Hodisa 28 may kuni soat 23:50 da D-169 avtomobil yo‘lining 132-kilometrida, “Chakar” mahallasida sodir bo‘lgan. 17 yoshli o‘smir o‘zining to‘rt nafar sinfdoshi bilan birga Damas rusumli avtomobilni boshqargan va 20 yoshli tanishi bilan poyga uyushtirgan. Ikkinchi yigit Nexia rusumli avtomobilni haydagan.

Natijada Damas haydovchisi (17 yosh) va Nexia yo‘lovchisi halok bo‘lgan. Qolgan barcha yo‘lovchilar turli darajadagi jarohatlar bilan kasalxonaga yotqizilgan.

Ma’lumotlarga ko‘ra, ikkala haydovchi ham haydovchilik guvohnomasiga ega bo‘lmagan. Bu holat yana bir bor yosh haydovchilar orasida yo‘l harakati qoidalariga rioya qilmaslik muammosini ko‘rsatmoqda.

Ichki ishlar vazirligi ma’lumotiga ko‘ra, 2026 yilning birinchi to‘rt oyida O‘zbekistonda yo‘l-transport hodisalari soni 17,7 foizga kamaygan. Biroq, birinchi chorakda sodir bo‘lgan baxtsiz hodisalarning 31,4 foizi o‘lim bilan yakunlangan.

Source: kun.uz