Prezident Shavkat Mirziyoyev 4 iyun kuni Xitoy Xalq Respublikasi delegatsiyasini, jumladan, Gonkong maxsus ma'muriy rayoni rahbari Li Szyachao boshchiligidagi delegatsiyani qabul qildi.

Uchrashuv boshida Li Szyachao davlat rahbariga Xitoy raisi Si Szinpinning iliq salomlari va ezgu tilaklarini yetkazdi.

Tomonlar O'zbekiston-Xitoy hamkorligini yanada kengaytirishning dolzarb jihatlarini, jumladan, mintaqalararo almashinuvlar va Gonkong bilan amaliy hamkorlikni kengaytirish kontekstida muhokama qildi.

Suhbatda so'nggi yillarda erishilgan O'zbekiston-Xitoy do'stlik munosabatlari va yangi davrdagi har qanday ob-havoda strategik sheriklikning misli ko'rilmagan darajasi chuqur mamnuniyat bilan qayd etildi.

Oliy darajadagi kelishuvlar izchil amalga oshirilmoqda. May oyida Pekinda Hukumatlararo komissiya yig'ilishi va Sian shahrida uchinchi Mintaqalararo forum muvaffaqiyatli o'tkazildi, Gonkongda iqtisodiy forum va sanoat ko'rgazmasi bo'lib o'tdi, O'zbekiston savdo uyi ochildi.

O'zbekiston hududlarining Gonkong bilan iqtisodiy sherikligi uchun mavjud salohiyatni jalb etish muhimligiga alohida e'tibor qaratildi. Gonkong ishbilarmon doiralari vakillari delegatsiyasining Toshkentga tashrifi bunga xizmat qilishiga ishonch bildirildi.

Savdo-iqtisodiy va moliyaviy aloqalarni kengaytirish, sanoat kooperatsiyasini yo'lga qo'yish, ta'lim, turizm va ishbilarmonlik almashinuvlarini rivojlantirish, shuningdek, to'g'ridan-to'g'ri aviaqatnov va fuqarolarga konsullik xizmati ko'rsatishni o'z ichiga olgan keng qamrovli hamkorlik dasturini qabul qilish muhimligi ta'kidlandi.

Ustuvor yo'nalishlar qatorida «yashil» energetika, agrosektor, biotexnologiyalar, raqamli iqtisodiyot, fintech, innovatsion startaplar, sun'iy intellekt va boshqalar nomlandi.

Hamkorlikning ustuvor yo'nalishlari bo'yicha qo'shma «yo'l xaritasi» qabul qilish, shuningdek, Ishbilarmonlar kengashini tashkil etish va yaqin vaqt ichida Gonkong bilan teng asosda vizasiz rejim o'rnatish to'g'risida kelishuvga erishildi.

Source: kun.uz