Farg‘ona viloyatida yengil avtomobil va yuk mashinasi ishtirokida halokatli yo‘l-transport hodisasi yuz berdi. Dastlabki ma’lumotlarga ko‘ra, 18 yoshli haydovchi boshqaruvidagi Lacetti-2 avtomobili quvib o‘tish chog‘ida qarama-qarshi yo‘lga chiqib ketgan, natijada ikki kishi vafot etgan.

Farg‘ona viloyati YHXB matbuot xizmati ma’lumotiga ko‘ra, halokatli avariya 14 iyun kuni soat 13:30 atrofida Farg‘ona viloyatining O‘zbekiston tumanida sodir bo‘lgan. Hodisa “Qo‘qon — Yaypan — Isfara” avtomobil yo‘lining 21-kilometrida, “A. Jomiy” mahallasidagi Navoiy ko‘chasida ro‘y bergan.

Dastlabki ma’lumotlarga ko‘ra, Lacetti-2 avtomobilini 18 yoshli qiz boshqargan. Quvib o‘tish chog‘ida u qarama-qarshi yo‘lga chiqib ketgan. Shu payt o‘z yo‘lagida harakatlanayotgan 53 yoshli haydovchi boshqaruvidagi FAW Tiger avtomobili bilan to‘qnashuv yuz bergan.

Zarba halokatli bo‘lgan. Lacetti-2 haydovchisi va 19 yoshli yo‘lovchi olgan jarohatlar tufayli shifoxonada vafot etgan.

Hozirda tergovgacha tekshiruv olib borilmoqda. Fojia holatlari aniqlanmoqda.

Avvalroq Namangan viloyatining Chust tumanida sodir bo‘lgan avariya uch kishining hayotiga zomin bo‘lgan edi. Cobalt haydovchisi rulda uxlab qolib, qarama-qarshi yo‘lga chiqib ketgan va Isuzu avtobusi bilan to‘qnashgan.

Source: podrobno.uz