O‘zbekiston milliy aviakompaniyasi Uzbekistan Airways xalqaro kapital bozoriga chiqishga tayyorgarlik ko‘rmoqda. Prezident Shavkat Mirziyoyev aviatashuvchini transformatsiya qilish jarayoni bilan tanishib, belgilangan islohotlarni tezlashtirishni topshirdi.
So‘nggi yillarda mamlakatda davlat ishtirokidagi yirik korxonalar faol isloh qilinmoqda, xalqaro korporativ boshqaruv va hisobot standartlari joriy etilmoqda. Muhim qadam sifatida Franklin Templeton kompaniyasiga boshqaruv ishonib topshirilgan Milliy investitsiya fondi tashkil etildi. May oyida fond xalqaro bozorda 690 million dollarlik aktivlarni birinchi marta joylashtirdi. Talab taklifdan to‘rt baravar oshib, investorlarning arizalari qariyb 3 milliard dollarga yetdi.
Endilikda fond portfelidagi 13 yirik kompaniyadagi islohotlarni tezlashtirish va ularni IPOga tayyorlash kerak. Birinchilar qatorida Uzbekistan Airways, “O‘zsanoatqurilishbank”, “O‘zbekgidroenergo”, “O‘zbekiston milliy elektr tarmoqlari” va “O‘zbektelekom” bor.
Aviakompaniya uchun Franklin Templeton 115 tadbirdan iborat dastur ishlab chiqdi. Uni amalga oshirish operatsion foydani yiliga 120 million dollarga oshirishi mumkin. Chora-tadbirlar qatoriga marshrutlarni optimallashtirish, to‘g‘ridan-to‘g‘ri sotuvlarni oshirish, xizmat ko‘rsatishni yaxshilash, reyslardagi kechikish va bekor qilishlarni qisqartirish, sho‘ba korxonalar (ovqatlantirish, texnik xizmat) samaradorligini oshirish, shuningdek malakali mutaxassislarni jalb qilish kiradi.
Natijada aviakompaniyaning bozor qiymati 1,6 milliard dollardan 2,3 milliard dollargacha o‘sishi mumkin. Biroq dasturni joriy etish sur’ati hozircha pastligicha qolmoqda. Prezident boshqaruv sifatini oshirish, moliyaviy intizomni kuchaytirish, xalqaro standartlar bo‘yicha hisobot yuritish va kredit reytingini yaxshilash zarurligini ta’kidladi.
Yil oxirigacha Uzbekistan Airways aksiyalarining 15–20 foizini IPO orqali sotish rejalashtirilgan. Shu munosabat bilan faoliyatni ob’ektiv baholash, aktivlar tarkibini optimallashtirish va davlat buyurtmasi doirasidagi xizmatlar uchun kompensatsiya mexanizmlarini takomillashtirish bo‘yicha choralar belgilandi.
Turizmning o‘sishi ham tezkor qarorlarni talab qilmoqda: yil boshidan buyon sayyohlar oqimi 27,5 foizga oshib, qariyb 5,5 million kishiga yetdi. Biroq samolyot parkini kengaytirish sekin ketmoqda. Shu sababli xaridlarning alohida tartibini joriy etish va parkni yangilash jarayonini tezlashtirish topshirildi.
Prezident Toshkentning Markaziy Osiyodagi eng yirik aviatsiya hubiga aylanishi uchun barcha imkoniyatlar borligini ta’kidladi. Buning uchun Uzbekistan Airways, Uzbekistan Airports va “Yangi Toshkent” aeroporti o‘rtasida muvofiqlashtirishni yo‘lga qo‘yish zarur.
Tizimli ish uchun loyiha ofisi tashkil etiladi, kompaniyalar boshqaruviga xalqaro moliya bozorlarida tajribaga ega mutaxassislar jalb qilinadi. Har bir kompaniya uchun IPOga tayyorgarlik jadvali tuziladi va uning bajarilishi qattiq nazorat qilinadi.
Avvalroq Uzbekistan Airways kompaniyasi yoqilg‘i inqirozi fonida Rossiyaga parvoz dasturini qayta ko‘rib chiqishni e’lon qilgan edi.
Source: podrobno.uz