Toshkent xalqaro investitsiya forumi sessiyasida Boston Consulting Group (BCG) boshqaruvchi direktori Suresh Subudi O‘zbekistonning aviatsiya sohasidagi salohiyati va muammolari haqida ma’lumot berdi. Uning so‘zlariga ko‘ra, Markaziy Osiyo dunyoning eng jadal rivojlanayotgan aviatsiya submintaqasiga aylangan, O‘zbekiston esa bu o‘sishning yetakchilaridan biri bo‘lib qolmoqda.

BCG taqdimotida IATA ma’lumotlariga asoslanib, 2025-yil yakuniga ko‘ra Markaziy Osiyoda yo‘lovchi oqimi taxminan 60 million kishiga yetishi kutilmoqda. O‘zbekistonda avia yo‘lovchilar soni 2019-yildagi 6,5 milliondan 2025-yilda 15,5 millionga oshgan, bu o‘rtacha yillik 16 foizlik o‘sishni anglatadi. Aviayuklar hajmi esa 49,4 ming tonnadan 98,1 ming tonnaga ko‘tarilgan (yillik 12 foiz).

Subudi ta’kidlashicha, aviatsiya talabi YAIM o‘sishidan 2,5 barobar tezroq o‘smoqda. 2017-yildan buyon O‘zbekistonga xizmat ko‘rsatuvchi aviakompaniyalar soni 16 tadan 68 taga yetgan, ularning aksariyati xorijiy tashuvchilardir. Biroq, o‘rtacha aviachipta narxi taxminan 25 ish kuniga teng keladi, bu Qozog‘istondagi 4 ish kuni va rivojlangan mamlakatlardagi 1 ish kunidan ancha yuqori.

Mamlakatning geografik joylashuvi “Yevropa-Osiyo” yo‘lagida aviatsiya habiga aylanish imkoniyatini beradi, ammo hozircha tranzit qatnovlari ulushi atigi 3 foizni tashkil etadi (Istanbul va Dubayda 40-70 foiz). Subudi bu sohada ulkan salohiyat borligini, ammo uni amalga oshirish uchun bir qator shartlar bajarilishi kerakligini aytdi.

Uchta asosiy chaqiriq: hablar raqobati (Qozog‘iston, Ozarbayjon va boshqa davlatlar aeroportlarini kengaytirmoqda), aeroport qurilishida kechikish va budjetdan oshib ketish xavfi (Berlin-Brandenburg aeroporti misoli), hamda aviakompaniyalarning raqobatbardoshligi. Subudi O‘zbekiston bir vaqtning o‘zida aeroportlar, hab va milliy tashuvchilarni rivojlantirishi zarurligini ta’kidladi.

Source: www.gazeta.uz