Ijtimoiy tarmoqlarda Andijon viloyatida bir erkakning 9 yoshli bolani shafqatsizlarcha kaltaklagani aks etgan video tarqaldi. Ushbu holat keng jamoatchilik e'tiroziga sabab bo'ldi.

Ichki ishlar vazirligi Jamoat xavfsizligi departamenti matbuot xizmati xabariga ko'ra, voqea Shahrixon tumanida sodir bo'lgan. 18 iyun kuni soat 15:05 da “102” qisqa raqamiga 46 yoshli mahalliy fuqaro qo'ng'iroq qilib, uning 9 yoshli o'g'liga tan jarohati yetkazilganini bildirgan. Voqea joyiga zudlik bilan ichki ishlar xodimlari yetib borib, tekshiruv boshlagan.

Dastlabki surishtiruvda aniqlanishicha, ikki 9 yoshli bola o'rtasida janjal kelib chiqib, mushtlashishga aylangan. Ulardan birining 37 yoshli otasi aralashgan, biroq bolalarni ajratish o'rniga boshqa bolaga bir necha zarba berib, unga jarohat yetkazgan.

Erkakning shaxsi aniqlanib, u ichki ishlar bo'limiga olib kelingan. Hozirda Shahrixon tumani IIB xodimlari tergovga qadar tekshiruv olib bormoqda. Voqea barcha holatlari sinchiklab o'rganilmoqda va yakuniga ko'ra barcha ishtirokchilarning harakatlariga qonunchilikka muvofiq huquqiy baho beriladi.

Qo'shimcha ma'lumotlar tekshiruv yakuniga ko'ra taqdim etiladi. Eslatib o'tamiz, avvalroq Farg'ona viloyatida o'z o'g'li uchun o'ch olish maqsadida maktabda o'z sudini o'tkazgan erkak qo'lga olingan edi.

Source: podrobno.uz