O‘zbekiston foydalanuvchilari so‘nggi kunlarda ijtimoiy tarmoqlar va messenjerlarda “eng yaxshi buvi”, “eng yaxshi bobo”, “eng yaxshi ota” yoki “eng yaxshi ona” kabi ko‘rik-tanlovlarda ovoz berishga chorlovchi havolalarni ko‘payganini payqamoqda.

Ushbu havolalar orqali foydalanuvchi saytga o‘tib, Telegram orqali avtorizatsiyadan o‘tishni so‘raydi. Aynan shu joyda xavf yashiringan: sayt foydalanuvchidan maxsus kodni kiritishni talab qiladi, bu kod esa uning Telegram akkauntiga kirish uchun mo‘ljallangan.

Kodni kiritish bilan firibgarlar akkauntni to‘liq egallab olishadi va egasining nomidan uning barcha kontaktlariga turli xabarlar yuborishni boshlashadi. Ko‘pincha ular “do‘stingizga yordam bering”, “zudlik bilan pul o‘tkazing” kabi so‘rovlar bilan murojaat qilishadi.

Kiberxavfsizlik markazi mutaxassislari bu kabi “tanlovlar” firibgarlarning akkauntlarni egallashning yangi usuli ekanini ta’kidlamoqda. Ular foydalanuvchilarni hech qachon Telegram kodini uchinchi shaxslarga bermaslikka, hatto havola yaqin do‘stlaridan kelgan bo‘lsa ham, ehtiyot bo‘lishga chaqiradi.

Markaz vakillarining qayd etishicha, bunday hujumlar soni ortib bormoqda va fuqarolar har qanday shubhali havolalarni ochmasliklari, shuningdek, akkauntlarida ikki bosqichli autentifikatsiyani yoqishlari tavsiya etiladi.

Eslatib o‘tamiz, avvalroq Toshkent shahrida kiberxavfsizlik bo‘limi xodimlari tomonidan poytaxtdagi kompaniyalardan birining hisobvarag‘idan 1 milliard so‘mdan ortiq mablag‘ni o‘g‘irlashda gumon qilingan yosh yigit ushlangan edi.

Source: podrobno.uz