Toshkent shahrining ijtimoiy-iqtisodiy rivojlanishiga bag'ishlangan yig'ilishda poytaxtda amalga oshirilayotgan keng ko'lamli islohotlar, xususan, davlat mulki obyektlarini auksion savdolariga chiqarish, piyodalar uchun qulay infratuzilma yaratish va tadbirkorlikni qo'llab-quvvatlash choralari muhokama qilindi.
Ma'lum qilinishicha, faqatgina Olmazor tumanida umumiy qiymati 100 milliard so'm bo'lgan 52 ta davlat mulki obyekti savdoga chiqarilmoqda. Ushbu obyektlarni tayyor loyihalar bilan birga tadbirkorlarga topshirish iqtisodiy faollikni oshirish va byudjet tushumlarini ko'paytirishga xizmat qiladi.
Shahar muhitini yaxshilash doirasida aholining faol dam olishi uchun sharoit yaratishga alohida e'tibor qaratilmoqda. "Kichkiriq" mahallasida uzunligi 2,5 kilometr bo'lgan sohil bo'ylab ekopark va 12,5 kilometrlik piyodalar yo'lakchalari barpo etildi. Shuningdek, poytaxt kanallari bo'ylab xavfsiz sayr zonalarini tashkil etish rejalashtirilmoqda. Xususan, Bo'zsuv kanali bo'ylab "Shahidlar xotirasi" yodgorlik majmuasidan Chilonzor tumanigacha bo'lgan 20 kilometrlik uzluksiz piyodalar yo'li bir oy ichida loyihalashtiriladi.
Kichik biznesni rag'batlantirish maqsadida poytaxtda ko'p qavatli uylarning birinchi qavatlarini savdo va xizmat ko'rsatishga moslashtirishga ruxsat beriladi. Shu bilan birga, yangi boshlovchi tadbirkorlar uchun garovsiz kredit limiti 100 million so'mdan 200 million so'mga oshiriladi. Ushbu choralar tufayli Olmazor tumanida joriy yilda 300 nafar tadbirkor qo'llab-quvvatlanib, 1000 ta yangi ish o'rni yaratiladi. Yil oxirigacha bu tajriba boshqa tumanlarga ham yoyilib, 20 ming nafar shahar aholisini ish bilan ta'minlaydi.
"Miskin" va "Ibrohim ota" mahallalari hududida 305 gektar maydonda 504 ta biznes obyektiga ega bo'lgan sanoat zonasi modernizatsiya qilinadi. Sanoat ipotekasi, kreditlash va lizingni joriy etish hisobiga bu yerda ish o'rinlari soni 35 mingdan 100 mingga yetadi, eksport hajmi esa 600 million dollarga etadi.
Hududda kadrlar tanqisligi masalasi ham o'z yechimini topmoqda. Olmazor kasb-hunar markazi bazasida 400 o'rinli axborot texnologiyalari va innovatsiyalar texnikumi tashkil etiladi, sobiq Toshkent arxitektura-qurilish kolleji binosida esa zamonaviy kasb-hunar markazi joylashtiriladi. Fuqarolarning chet elda ishlashi uchun 500 kishi uchun nemis tili kurslari tashkil etilib, Chexiya va Slovakiya uchun tibbiyot xodimlari tayyorlanadi. Germaniya, Yaponiya, Koreya va Buyuk Britaniyadan 20 ta yirik rekruting kompaniyalari jalb qilinadi, Fransiya firmalari bilan esa yiliga 1,5 ming kishini mavsumiy ish bilan ta'minlash loyihasi amalga oshiriladi.
Bundan tashqari, yil oxirigacha 42 gektar maydonda joylashgan "Yoshlar shaharchasi" talabalar shaharchasida IT-park, yuqori texnologiyali ishlab chiqarishlar va ta'lim muassasalarini birlashtiruvchi innovatsion klaster yaratish ishlari boshlanadi. Eslatib o'tamiz, joriy yilda poytaxtning 12 ta tumani bo'ylab 9 milliard dollar investitsiya jalb qilish rejalashtirilgan edi, biroq prezidentning videoselektor yig'ilishida bu ishlarni yanada faollashtirish zarurligi ta'kidlandi.
Source: podrobno.uz