O'zbekiston va Qirg'iziston chegarasida yangi "Keskanor" nomli o'tish punkti tashkil etiladi. Bu punkt amaldagi "Do'stlik" o'tish punktidan ikki baravar katta bo'ladi. Mutasaddilar yangi punkt ishga tushgach, ikki davlat o'rtasidagi yuk tashish hajmi ikki-uch baravar oshishini, chegaradan o'tish vaqti esa bir haftaga qisqarishini taxmin qilmoqda.

Bu haqda Prezident Shavkat Mirziyoyev raisligida Andijon viloyatining ijtimoiy-iqtisodiy rivojlanishi, tadbirkorlikni qo'llab-quvvatlash va aholi daromadlarini oshirish masalalariga bag'ishlangan yig'ilishda ma'lum bo'ldi. Yig'ilishda mintaqadagi transport oqimlarining kengayishi munosabati bilan "Keskanor" o'tish punktini yaratish zarurati ta'kidlandi.

Xususan, "Xitoy – Qirg'iziston – O'zbekiston" temir yo'li ishga tushgach, Andijon viloyati orqali yuk tashish hajmini o'n baravar oshirish – yiliga 15 million tonnaga yetkazish rejalashtirilmoqda. O'sib borayotgan yuk oqimiga xizmat ko'rsatish maqsadida joriy yil oxirigacha Qo'rg'ontepa va Xonobodda 300 gektar maydonda 600 million dollar qiymatidagi logistika majmuasi loyihasini boshlash topshirildi.

Bundan tashqari, 78 kilometrlik "Xonobod – Andijon" pullik avtomobil yo'lining loyihalash ishlari boshlanadi. Yana bir transport loyihasi – "Toshkent – Andijon" pullik yo'li bo'ladi. Uning qurilishi bo'yicha amaliy ishlar kelasi yilda boshlanishi rejalashtirilgan. Shu bilan birga, sentabr oyidan "Toshkent – Andijon" tezyurar poyezdi ishga tushirilgan. Shaharlar orasidagi yo'l vaqti olti soatdan to'rt soatga qisqardi.

Source: podrobno.uz