Namangan viloyatining Uchqoʻrgʻon tumanida maktabgacha va maktab taʼlimi boʻlimi masʼul shaxslari hamda boshqa mutasaddilar ishtirokida byudjet mablagʻlarini oʻzlashtirish bilan bogʻliq jiddiy qonunbuzarlik holati aniqlandi. Bosh prokuratura huzuridagi Iqtisodiy jinoyatlarga qarshi kurashish departamenti xabariga koʻra, amalda umuman faoliyat yuritmagan maktabgacha taʼlim tashkilotlari uchun davlat budjetidan katta miqdordagi mablagʻlar noqonuniy ravishda yoʻnaltirilgan.

Departamentning tuman boʻlimi tomonidan oʻtkazilgan tergovga qadar tekshiruv jarayonida maʼlum boʻlishicha, tuman maktabgacha va maktab taʼlimi boʻlimining ayrim masʼul shaxslari oʻzaro jinoiy til biriktirib, gʻarazli maqsadlarni koʻzlagan. Jumladan, ular Mehnatobod va Dehqonobod mahallalarida joylashgan oddiy xonadonlarda goʻyo yangi maktabgacha taʼlim tashkilotlari tashkil etilgani haqida soxta hujjatlar tayyorlab, ularni davlat roʻyxatidan oʻtkazishga erishgan.

Biroq tekshiruvlar davomida mazkur koʻrsatilgan manzillarda hech qanday bogʻcha ishlamagani va bolalar qabul qilinmagani aniqlandi. Shunga qaramay, masʼul shaxslar rasmiy hujjatlarga ataylabdan yolgʻon maʼlumotlar kiritishda davom etgan va natijada ushbu “qogʻozdagi” tashkilotlarga davlat budjetidan naqd 1,3 milliard soʻm subsidiya mablagʻlari ajratilishiga erishgan. Ajratilgan bu mablagʻlar esa oʻzlashtirish va rastrata qilish yoʻli bilan butunlay talon-toroj qilingan.

Mazkur holat yuzasidan Jinoyat kodeksining tegishli moddalari, jumladan, 167-modda (Oʻzlashtirish yoki rastrata yoʻli bilan talon-toroj qilish), 207-modda (Mansabga sovuqqonlik bilan qarash) hamda 209-modda (Mansab soxtakorligi) boʻyicha jinoyat ishi qoʻzgʻatildi. Hozirgi vaqtda huquqni muhofaza qiluvchi idoralar tomonidan barcha ishtirokchilarning harakatlarini toʻliq fosh etishga qaratilgan tergov harakatlari jadal davom ettirilmoqda.

Source: kun.uz