O‘zbekiston Respublikasi Prezidenti Shavkat Mirziyoyev mamlakatimizdagi issiqxona xo‘jaliklarida yashil texnologiyalarni joriy etish hamda ularning ekologik xavfsiz faoliyatini ta'minlashga bag‘ishlangan taqdimot bilan tanishdi. Mazkur tashabbus sohada ekologik nazoratni kuchaytirish va atmosferaga tashlamalarni kamaytirishga qaratilgan muhim qadam sifatida baholanmoqda.

Taqdimot davomida joriy yilning 15-oktabridan kelgusi yilning 15-martigacha bo‘lgan davrda barcha issiqxona xo‘jaliklarida doimiy ekologik monitoring amalga oshirilishi ma'lum qilindi. Ushbu nazorat jarayonida chang-gazni tozalash uskunalarining ishlashi, atmosferaga chiqarilayotgan tashlamalar hajmi hamda foydalanilayotgan yoqilg‘i turlarining belgilangan talablarga muvofiqligi qat'iy tekshiriladi.

Monitoring tizimini shaffof va samarali tashkil etish maqsadida o‘lchov vositalari hamda videokuzatuv kameralaridan olinadigan ma'lumotlar Milliy ekologiya qo‘mitasining axborot tizimiga real vaqt rejimida uzatilishi ta'minlanadi. Shuningdek, jarayonga zamonaviy dronlar jalb etilib, jamoatchilik vakillari ham faol ishtirok etishi ko‘zda tutilgan.

Agar issiqxonalarda chang-gazni tozalash uskunalari mavjud bo‘lmasa, belgilangan me'yorlar buzilsa yoki taqiqlangan yoqilg‘i turlaridan foydalanilsa, qat'iy ta'sir choralari ko‘rilishi ogohlantirildi. Zarurat tug‘ilganda, bunday xo‘jaliklarning faoliyati to‘xtatilishi belgilandi.

Shu bilan birga, tadbirkorlarga yangi ekologik talablarga moslashishda ko‘maklashish uchun moliyaviy qo‘llab-quvvatlash mexanizmlari ishlab chiqildi. Xususan, har bir gektar yer uchun ekologik va energiya tejamkor uskunalarni o‘rnatishga 50 million so‘mgacha subsidiyalar ajratish, shuningdek, yetti yil muddatga 3 milliard so‘mgacha imtiyozli kreditlar taqdim etish taklif etilmoqda.

Source: uznews.uz