“O‘zbekiston pochtasi” milliy pochta operatori (UzPost) aksiyalarining davlat paketi Rossiyaning Wildberries marketpleysiga tegishli bo‘lgan “WB INT EXPORT” MCHJga ishonchli boshqaruvga berilgani ma’lum bo‘ldi. Bu holat joriy yilning 21-sentabr sanasida bo‘lib o‘tgan aksiyadorlar yig‘ilishining rasmiy bayonnomasidan kelib chiqadi. Hujjatda tomonlar o‘rtasida tuzilgan ishonchli boshqaruv shartnomasi va uning doirasida amalga oshirilgan qator huquqiy harakatlarga bir necha bor urg‘u berilgan.
Xususan, mazkur shartnomaning 6.1-bandiga tayangan holda, “WB INT EXPORT” MCHJ tomonidan 2026-yil 31-martda maxsus xat yuborilib, pochta operatorining kuzatuv kengashiga o‘zining besh nafar nomzodini kiritish talab etilgan. Shuningdek, hujjatda “Aksiyadorlik jamiyatlari va aksiyadorlar huquqlarini himoya qilish to‘g‘risida”gi qonunning tegishli moddalariga asoslanib, xorijiy kompaniya davlat aksiyalari paketining ishonchli boshqaruvchisi maqomiga egaligi va barcha tegishli aksiyadorlik huquqlarini amalga oshirishi ko‘rsatib o‘tilgan.
O‘tkazilgan yig‘ilish natijalariga ko‘ra, uch yil muddatga saylangan to‘qiz kishidan iborat yangi kuzatuv kengashining naqd beshta o‘rni Wildberries & Russ tuzilmalariga aloqador vakillar tomonidan egallandi. Qolgan to‘rtta o‘rin esa davlat idoralari vakillari hamda kengashning mustaqil a’zosiga nasib etdi. Shuni alohida ta’kidlash joizki, ushbu jarayonlar davlat rasmiylari ilgari bergan bayonotlariga zid kelmoqda.
Xususan, Davlat aktivlarini boshqarish agentligi direktori Sohibjon Murodov oktabr oyidagi matbuot anjumanida UzPost Wildberries ishonchli boshqaruvida emasligini, faqatgina hamkorlik shartnomasi mavjudligini ta’kidlagan edi. Biroq yig‘ilish bayonnomalari va rasmiy hujjatlar buning aksini ko‘rsatib, xorijiy investorning korxonadagi ta’siri sezilarli darajada kengayganidan dalolat bermoqda.
Source: www.gazeta.uz