O‘zbekistonda aholini issiqlik energiyasi bilan ta’minlash tizimini yaxshilash va modernizatsiya qilish bo‘yicha keng ko‘lamli chora-tadbirlar boshlandi. Hozirgi kunda mamlakat aholisining atigi 5 foizigagina markazlashtirilgan isitish tizimi to‘liq yetib boradi, bu esa mavjud infratuzilmaning eskirganidan dalolat beradi. Energetika vazirligi ushbu muammoni hal qilish uchun infratuzilmani yangilash, raqamli hisobga olishni joriy etish hamda xizmatlar tannarxini optimallashtirishni rejalashtirayotganini ma’lum qildi.

Rasmiy ma’lumotlarga ko‘ra, respublikadagi 46,2 mingta ko‘p kvartirali uylardan atigi 16,7 mingtasinigina markazlashgan issiqlik tarmog‘iga ulash imkoniyati mavjud xolos. Bunday binolarning sezilarli qismi poytaxt Toshkent shahri, Toshkent viloyati hamda Navoiy viloyatiga to‘g‘ri keladi. Qolgan hududlarda esa tarmoqlar yetishmaydi yoki mutlaqo mavjud emas, bu esa tarmoqni kengaytirishda katta qiyinchiliklarni tug‘dirmoqda.

Vaziyatni o‘nglash maqsadida mutaxassislar mavjud tizimlarning holatini baholash va zarur o‘zgarishlarni belgilash uchun keng qamrovli texnik audit o‘tkazishni rejalashtirmoqda. Ushbu tahlillar asosida 2030 yilgacha mo‘ljallangan tarmoqni rivojlantirish strategiyasi ishlab chiqiladi. Xalqaro maslahatchilarni jalb etgan holda ushbu muhim hujjatni 2027 yilning 1 apreliga qadar yakunlash ko‘zda tutilgan.

Infratuzilmani yangilash bilan bir qatorda, energetika idorasi issiqlik ta’minoti korxonalarida korporativ boshqaruvni yaxshilash va xalqaro moliyaviy hisobot standartlarini tatbiq etish niyatida. Ushbu choralar korxonalar faoliyatining shaffofligini oshirishi hamda sarflanadigan xarajatlarni aniqroq baholashga yordam berishi kutilmoqda. Avvalroq vazirlik tariflar oshirilishini amaldagi narxlar xarajatlarni qoplamasligi va farq davlat byudjetidan qoplanishi bilan izohlagan edi.

Source: podrobno.uz