Oʻzbekiston rahbari Shavkat Mirziyoyev 15-oktabr kuni Boku shahrida Laos Xalq Demokratik Respublikasi Prezidenti Txonglun Sisulit bilan rasmiy uchrashuv oʻtkazdi. Mazkur muloqot davomida ikki davlat oʻrtasidagi anʼanaviy aloqalarni sifat jihatidan yangi bosqichga olib chiqish masalalari atroflicha koʻrib chiqildi.

Tomonlar oʻzaro savdo hajmini oshirish, ishbilarmonlik doiralari oʻrtasidagi toʻgʻridan-toʻgʻri aloqalarni rivojlantirish muhimligiga alohida eʼtibor qaratdilar. Xususan, transport va logistika tarmogʻi, farmatsevtika sanoati, zamonaviy tibbiyot hamda turizm yoʻnalishlarida qoʻshma investitsion loyihalarni ilgari surish ustuvor vazifalar sifatida belgilandi.

Shuningdek, savdo-iqtisodiy hamkorlikni tartibga soluvchi huquqiy asoslarni kengaytirish zarurligi qayd etildi. Madaniy-gumanitar sohada, xususan, taʼlim yoʻnalishida oʻzaro almashinuvlarni faollashtirish ikki xalq oʻrtasidagi doʻstona rishtalarni yanada mustahkamlashiga ishonch bildirildi.

Ikki mamlakat yetakchilari xalqaro va mintaqaviy kun tartibidagi dolzarb masalalar yuzasidan ham fikr almashib, koʻp tomonlama tuzilmalar doirasida bir-birini qoʻllab-quvvatlash muhimligini taʼkidlab oʻtdilar.

Source: kun.uz