Oʻzbekiston rahbari Shavkat Mirziyoyev 15-oktabr kuni Ozarboyjon poytaxti Boku shahrida boʻlib oʻtgan Osiyoda hamkorlik va ishonch choralari boʻyicha kengashning (OHICHK) yettinchi sammitida ishtirok etdi. Ushbu nufuzli xalqaro platforma doirasida davlatlar oʻrtasidagi oʻzaro ishonch va mintaqaviy barqarorlikni taʼminlash masalalari muhokama markazida boʻldi.

Sammitda soʻzga chiqqan Oʻzbekiston yetakchisi zamonaviy dunyodagi chuqur geosiyosiy oʻzgarishlar va Osiyo mintaqasidagi qurolli nizolar barchada jiddiy xavotir uygʻotayotganini taʼkidladi. Uning soʻzlariga koʻra, bu kabi mojarolarning oqibatlari global iqtisodiyotga va millionlab odamlarning hayotiga salbiy taʼsir koʻrsatmoqda.

Shu munosabat bilan, Oʻzbekiston tomonidan Osiyoda ishonch infratuzilmasini shakllantirish konsepsiyasini ishlab chiqish taklif etildi. Mazkur tashabbus davlatlar oʻrtasidagi oʻzaro bogʻliqlikni mustahkamlash, transport-energetika loyihalarini amalga oshirish hamda xalqaro huquq meʼyorlariga tayangan holda muammolarni tinch yoʻl bilan hal etishni koʻzda tutadi.

Shuningdek, nutqda sunʼiy intellektdan masʼuliyatli foydalanish va iqlim oʻzgarishlariga moslashish masalalariga ham alohida eʼtibor qaratildi. Prezident raqamli taraqqiyot barchaga birdek foyda keltirishi va texnologik tafovutni qisqartirish uchun saʼy-harakatlarni birlashtirish muhimligini qayd etdi.

Source: kun.uz