O‘zbekiston Respublikasi Prezidenti Shavkat Mirziyoyev yoqilg‘i-energetika tarmog‘i investorlari Kengashining navbatdagi yig‘ilishi doirasida Turkiyaning yirik "Cengiz Holding" kompaniyasi boshqaruvi raisi Mehmet Cengizni qabul qildi. Uchrashuvda ikki mamlakat o‘rtasidagi iqtisodiy aloqalar va energetika yo‘nalishidagi istiqbollar atroflicha ko‘rib chiqildi.

Davlat rahbari suhbat davomida O‘zbekiston va Turkiya o‘rtasidagi o‘zaro tovar ayirboshlash hajmi jadal sur’atlar bilan o‘sib borayotganini mamnuniyat bilan qayd etdi. Shuningdek, turk kompaniyalari ishtirokida mamlakatimizda amalga oshirilayotgan yirik qo‘shma investitsiya loyihalari muvaffaqiyatli natija berayotgani e’tirof etildi.

Tomonlar energetika, geologiya razvedkasi va infratuzilmani rivojlantirish sohalarida amaliy sheriklikni yanada kengaytirish masalalariga alohida e’tibor qaratdilar. Xususan, respublikada yangi issiqlik elektr stansiyalarini barpo etish hamda mavjud elektr tarmoqlarini modernizatsiya qilish bo‘yicha yangi tashabbuslar muhokama qilindi.

Source: podrobno.uz