O‘zbekiston Ichki ishlar vazirligi tomonidan mamlakatdagi xususiy maktablar, oliy va o‘rta maxsus ta’lim muassasalarida tartibni saqlash hamda huquqbuzarliklarning oldini olishga qaratilgan yangi qaror loyihasi muhokamaga taqdim etildi. Mazkur tashabbus doirasida ta’lim muassasalarida maxsus ichki ishlar xodimlari shtat birliklarini kiritish rejalashtirilmoqda.

Hujjat loyihasiga ko‘ra, 2026-yilning 1-sentabridan boshlab nodavlat ta’lim tashkilotlarida tegishli lavozimlarni aynan muassasalarning o‘z mablag‘lari hisobidan moliyalashtirish va tashkil etishga ruxsat berish nazarda tutilgan. Xususan, oliy ta’lim maskanlarida profilaktika katta inspektori hamda xotin-qizlar masalalari bo‘yicha katta inspektor lavozimlari joriy etilishi kutilmoqda.

Shuningdek, o‘rta va o‘rta maxsus ta’lim tashkilotlarida voyaga yetmaganlar masalalari bo‘yicha inspektor-psixologlar faoliyatini yo‘lga qo‘yish belgilangan. Ushbu xodimlarning asosiy vazifasi o‘quvchi va talabalar orasida turli huquqbuzarliklar, zo‘ravonlik, bulling, giyohvandlik hamda ekstremistik g‘oyalar ta’sirining oldini olishdan iborat bo‘lishi ta’kidlanmoqda.

Yangi tartibga asosan, xususiy ta’lim tashkilotlari ichki ishlar organlari xodimlari uchun alohida xizmat xonasini ajratishi, uni to‘liq ta’mirlab, zarur mebel, zamonaviy aloqa vositalari va kompyuter jamlanmalari bilan ta’minlashi shart bo‘ladi. Hozirda mazkur normativ-huquqiy hujjat loyihasi yuzasidan jamoatchilik muhokamalari davom etmoqda.

Source: kun.uz