O'zbekiston nafaqat xorijiy investorlar, balki mamlakatni yashash va ishlash uchun qulay makon sifatida ko'rayotgan chet ellik mutaxassislar uchun ham jozibador bo'lib bormoqda. Bu haqda O'zbekistondagi Amerika savdo palatasi ijrochi direktori Tatyana Bistrushkina ma'lum qildi, deb xabar beradi Podrobno.uz muxbiri.

Uning so'zlariga ko'ra, oxirgi o'n yil ichida mamlakatdagi vaziyat sezilarli darajada o'zgargan. Ilgari o'zbekistonliklar o'qish va ishlash uchun chet elga intilgan bo'lsa, hozirgi kunda vatandoshlarning bir qismi o'z Vataniga qaytmoqda va xorijlik professional kadrlar ham respublikaga kelmoqda.

Mutaxassisning o'zi Samarqanddan bo'lib, Buyuk Britaniyada tahsil olgan va ishlagan. U O'zbekistonga bo'lgan qiziqish ortib borayotganiga misol tariqasida o'tgan hafta mamlakatga tashrif buyurgan Britaniya, Italiya va Gruziya delegatsiyalarini keltirib o'tdi. Ularning vakillari respublikada yashash hamda ishlash imkoniyatlari bilan qiziqqan.

Shuningdek, Bistrushkina hukumat investitsiya faoliyatini rivojlantirish uchun zarur shart-sharoitlar yaratganini ta'kidladi. U soliq, qonunchilik va regulyator bazalarini ijobiy omillar sifatida qayd etib o'tdi.

Eslatib o'tamiz, avvalroq O'zbekiston va AQSh rejimi savdo, investitsiya va texnologiyalar sohasida umumiy qiymati 12 milliard dollarlik 54 ta shartnoma imzolagani xabar qilingandi. Ushbu kelishuvlar transport, energetika, tog'-kon sanoati, moliya va boshqa qator muhim tarmoqlarni qamrab oladi.

Source: podrobno.uz