O‘zbekiston Respublikasi Prezidentining tegishli qarorlariga muvofiq, mamlakatimizda yangi tashkil etilgan Ta’lim va ilm-fan vazirligi rahbariga uch nafar yangi o‘rinbosar tayinlandi. Ushbu kadrlar o‘zgarishlari ta’lim tizimining barcha bo‘g‘inlarini yanada takomillashtirish va boshqaruv samaradorligini oshirish maqsadida amalga oshirilmoqda.

Xususan, Oybek Behzodovich Yo‘ldoshev vazirning birinchi o‘rinbosari lavozimiga tasdiqlandi. Ma’lumotlarga ko‘ra, u tayinlovga qadar nufuzli PwC Uzbekistan kompaniyasida davlat sektori, infratuzilma hamda ESG yo‘nalishlari bo‘yicha konsalting amaliyoti direktori lavozimida faoliyat yuritib, boy xalqaro tajriba to‘plagan.

Shuningdek, Mehriniso Doniyorovna Pardayeva vazir o‘rinbosari etib tayinlandi. U bu lavozimga kelguniga qadar Ta’limni rivojlantirish respublika ilmiy-metodik markazida boshqarma boshlig‘i lavozimida faoliyat olib borgan va sohadagi ilmiy yondashuvlarni shakllantirishda qatnashgan.

Sanjar Mahamatjon o‘g‘li Mirzaliyev vazirning yana bir o‘rinbosari lavozimini egalladi. Bungacha u Belarus-O‘zbekiston tarmoqlararo amaliy texnik kvalifikatsiyalar instituti ijrochi direktori lavozimida faoliyat yuritib, xalqaro ta’lim aloqalarini rivojlantirishga mas’ul bo‘lgan.

Eslatib o‘tamiz, mazkur yangi idora joriy yilning 3-oktabridagi Prezident farmoniga asosan Maktabgacha va maktab ta’limi vazirligi hamda Oliy ta’lim, fan va innovatsiyalar vazirligini birlashtirish yo‘li bilan tashkil etilgan edi. 9-oktabr kuni esa ushbu keng qamrovli idora rahbarligiga Erkinjon Turdimov tayinlangandi.

Source: www.gazeta.uz