Toshkent shahar jamoat transportida yo'lovchilarning noroziligiga sabab bo'layotgan muammo yuzasidan rasmiy munosabat bildirildi. Poytaxt avtobuslaridagi monitorlarda namoyish etilayotgan reklama roliklarining ovozini pasaytirish choralari ko'rilmoqda. Bu qaror shaharliklardan kelib tushgan ko'plab shikoyatlardan so'ng qabul qilindi.

"Toshshaxartransxizmat" ma'lumotlariga ko'ra, avtobuslardagi reklama joylari E-auksion elektron savdolarida g'olib chiqqan tadbirkorga berilgan. Yo'lovchilarning e'tirozlaridan keyin tashuvchi vakillari muammoni muhokama qilish uchun maxsus uchrashuv o'tkazdi.

Muzokaralar davomida tadbirkorga reklamalar ovozini odamlarning o'zaro muloqot qilishiga, shuningdek, haydovchilarning o'z vazifalarini bajarishiga to'sqinlik qilmaydigan darajagacha pasaytirish tavsiya etildi. Biroq, tovush darajasi bo'yicha aniq cheklovlar va ularning joriy etilish muddatlari hozircha e'lon qilinmadi.

Kompaniya vakillari ushbu masala qat'iy nazoratga olinganini ta'kidlashdi. Yo'lovchilarning qulayligi hamda jamoat transportida ortiqcha shovqinning oldini olish asosiy e'tibor markazida bo'lishi aytilmoqda, biroq aholi ilgari ham konditsionerlar ishlamasligi kabi muammolardan shikoyat qilgan edi.

Source: podrobno.uz