O'zbekistonda elektromobillar uchun quvvatlash stansiyalarini tashkil etish va zamonaviy elektr uzatish tarmoqlarini barpo etish kabi dolzarb masalalar Turkiyaning yirik EKSIM Holding kompaniyasi rahbariyati bilan o'tkazilgan uchrashuvda diqqat markazida bo'ldi. Tomonlar energetika, geologiya hamda tog'-kon sanoatidagi mavjud loyihalarni kengaytirish va ularning samaradorligini oshirish istiqbollarini atroflicha ko'rib chiqdilar.

Prezident matbuot xizmatining xabar berishicha, davlat rahbari Shavkat Mirziyoyev 29-oktyabr kuni Turkiy davlatlar tashkiloti sammiti doirasida EKSIM Holding kompaniyasi boshqaruv kengashi raisi Ebubekir Tivniklini qabul qildi. Uchrashuv davomida qayta tiklanuvchi energetika quvvatlarini joriy etish, geologiya-qidiruv ishlari, tog'-kon sanoati, infratuzilmani rivojlantirish hamda oziq-ovqat sanoati sohalarida yangi tashabbuslarni ilgari surish masalalari muhokama qilindi.

Muloqot chog'ida mamlakat hududida yangi elektr uzatish tarmoqlarini qurish va geologiya yo'nalishidagi istiqbolli loyihalarni amalga oshirish yuzasidan o'zaro fikr almashildi. Shavkat Mirziyoyev O'zbekiston va Turkiya o'rtasidagi ko'p qirrali hamkorlik barcha ustuvor yo'nalishlarda izchil rivojlanib borayotganini mamnuniyat bilan qayd etib o'tdi.

Source: kun.uz