Toshkent shahri va Toshkent viloyatida huquqni muhofaza qiluvchi idoralar xodimlari tomonidan o'tkazilgan tezkor tadbirlar natijasida giyohvandlik vositalarini tarqatish bilan shug'ullangan yirik jinoiy guruh faoliyatiga chek qo'yildi. Maxsus operatsiya davomida muomaladan 500 gramm marixuana va 2 kilogrammdan ortiq kuchli ta'sir qiluvchi mefedron sintetik moddasi olib qo'yildi. Rasmiy manbalarning taxmin qilishicha, musodara qilingan bu moddalarning umumiy hajmi qariyb 52 800 ta dozani tashkil etadi.
Joriy yilning 21-oktabr kuni Ichki ishlar vazirligining Tezkor-qidiruv departamenti, uning hududiy bo'linmalari hamda Davlat xavfsizlik xizmati xodimlari hamkorligida poytaxtning Uchtepa va Bektemir tumanlarida, shuningdek, Toshkent viloyatining Ohangaron tumanida keng ko'lamli tezkor tadbirlar tashkil etildi. Olib borilgan tezkor harakatlar natijasida 2004-yilda tug'ilgan uch nafar shaxs "Tracker" rusumli avtomashinada narkotik moddalarni tarqatayotgan paytda qo'lga olindi. Gumonlanuvchilar jinoiy guruh tarkibida omborchi va taqiqlangan moddalarni yashirin joylarga qoldirib ketuvchi tarqatuvchi vazifalarini bajarib kelgani aniqlandi.
Huquq-tartibot idoralari xodimlari tomonidan ularning yashash xonadonlari hamda ijaraga olingan dala hovlilari ko'zdan kechirilib, tegishli tergov harakatlari bajarildi. Tekshiruvlar chog'ida giyohvandlik vositalaridan tashqari, 1000 dona zip-paketlar, elektron tarozilar va boshqa ashyoviy dalillar protsessual tartibda rasmiylashtirib olindi. Shundan so'ng, guruhning boshqa a'zolarini aniqlashga qaratilgan tadbirlar Yuqori Chirchiq tumanida davom ettirilib, ochiq dala maydonida yashirilgan sintetik moddalarni olish uchun kelgan shaxslar va ularning sheriklari ham ushlandi.
Aniqlanishicha, qo'lga olinganlar orasida turli ta'lim muassasalarida tahsil olayotgan yoshlar hamda ilgari sudlangan shaxslar ham mavjud bo'lib, ular 1999, 2000, 2001 va 2007-yillarda tug'ilganligi ma'lum bo'ldi. Dastlabki surishtiruv ma'lumotlariga ko'ra, gumonlanuvchilar bir necha oy davomida internetdagi yashirin narkodukonlar tashkilotchilarining topshiriqlarini bajarib kelgan va avval tarqatuvchi, keyinchalik esa omborchi vazifalariga o'tgan. Mazkur holat yuzasidan O'zbekiston Respublikasi Jinoyat kodeksining 273-moddasi 6-qismi "a" bandi bo'yicha jinoyat ishi qo'zg'atilib, hozirgi kunda tergov harakatlari olib borilmoqda.
Source: kun.uz