O'g'li va jiyanini Sankt-Peterburgdagi bitiruv bayramiga yuborgan Muzaffar Hamdamov lavozimidan ozod qilindi. Yana 5 xodimga nisbatan intizomiy choralar qo'llash to'g'risidagi takliflar kiritildi.
Foto: Samarqand viloyati maktabgacha va maktab ta'limi boshqarmasi
Davlat xizmatchilari qarindoshlarini iqtidorli o'quvchilar o'rniga Sankt-Peterburgdagi bitiruv bayramiga yuborilganligi haqidagi fakt bo'yicha xizmat tekshiruvi o'tkazildi. Natijada Samarqand viloyati maktabgacha va maktab ta'limi boshqarmasi rahbari Muzaffar Hamdamov lavozimidan ozod qilindi. Ma'lumotni Korruptsiyaga qarshi kurash agentligi tasdiqladi.
Tekshiruv jarayonida mas'ul shaxslar "Davlat fuqarolik xizmati to'g'risida" va "Qiziqishlar to'qnashtashuvligi to'g'risida"gi qonunlar talablariga, shuningdek davlat xizmatchilarining xizmat axloqi normalariga zid harakatlar qilganliklari, qo'pol xatolar va buzilishlarga yo'l qo'yganliklari aniqlandi.
Bundan tashqari, vazirlikka boshqarma o'rinbosari A.B., buxgalteriya hisobi va davlat xaridlari bo'limi yetakchi mutaxassisi O.M., o'qituvchilar bilim va malakasini baholash tashkiloti bo'limi bosh metodisti O.M., o'quvchilar bilimlarini baholash va tahlili bo'limi boshlig'i G.S., shu bo'lim metodisti I.X.ga nisbatan intizomiy jazolar qo'llash to'g'risidagi takliflar kiritildi.
Masala vazirlik Axloq komissiyasining yig'ilishida ko'rib chiqilib, kelajakda bunday holatlarning oldini olish choralari belgilandi.
Ma'lumot uchun: Muzaffar Hamdamov 2019 yildan Paxtachi tumani hokimi lavozimida ishlagan, 2025 yil fevral oyida esa viloyat boshqarmasi rahbari etib tayinlangan.
Eslatib o'tamiz, 2025 yil iyun oyida Sankt-Peterburgdagi "Qizil yelkanlar" bayramiga o'quv yilini a'lo baholarla tugatgan o'quvchilar o'rniga boshqarma ayrim davlat xizmatchilarining bolalari va qarindoshlari yuborilgan edi.
Shundan so'ng Korruptsiyaga qarshi kurash agentligi tekshiruv boshladi. Natijalariga ko'ra, xorijiy safar uchun mahalliy byudjetdan ajratilgan 95 million so'mdan 3 nafar o'quvchining ota-onalari tomonidan 28 million so'm byudjetga qaytarilgan. Shuningdek, vazirlikka homiylik qilgan davlat xizmatchilarini lavozimidan ozod qilish to'g'risida ko'rsatma kiritilgan edi.
Source: kun.uz