Kaliforniyaning San-Diego shahridagi Islom markazida ikki o‘smir tomonidan uyushtirilgan otishma oqibatida uch kishi halok bo‘ldi. Hodisa nafrat jinoyati sifatida tergov qilinmoqda.

San-Diego politsiya boshlig‘i Skott Valning ma’lum qilishicha, 17 va 18 yoshli gumonlanuvchilar masjidda otishma uyushtirib, so‘ng o‘z joniga qasd qilgan. Politsiya ularning “umumiy nafrat ritorikasi” bilan shug‘ullanganini aniqlagan.

Otishmadan oldin gumonlanuvchilardan birining onasi politsiyaga qo‘ng‘iroq qilib, o‘g‘lining qurol va mashina bilan qochib ketgani va o‘z joniga qasd qilishidan qo‘rqqanini aytgan. Politsiya qidiruvni boshlaganida, Islom markazida otishma haqida xabar kelib tushgan.

Voqea joyiga yetib kelgan politsiyachilar bir necha ko‘cha narida yana otishma ovozi eshitilgan. Gumonlanuvchilar yaqin atrofdagi yo‘lda to‘xtab qolgan mashinada o‘z-o‘zini otgan holda topilgan. Valning aytishicha, hech bir politsiyachi o‘q uzmagan.

Masjid qo‘riqchisi hujumda halok bo‘lgan uch kishidan biri bo‘lib, uning harakatlari ko‘proq qurbonlarning oldini olgan. “Uning xatti-harakatlari qahramonona edi va shubhasiz, bugun hayotlarni saqlab qoldi”, dedi Val.

Islom markazi direktori Imom Toha Xassanning aytishicha, maktab o‘quvchilariga hech qanday zarar yetmagan. “Biz hech qachon bunday fojiani boshdan kechirmaganmiz”, dedi u.

Nyu-York meri Zohran Mamdani hujumni “islomga qarshi zo‘ravonlik harakati” deb atadi. AQSh prezidenti Donald Tramp voqeani “dahshatli holat” deb baholadi. Kaliforniya gubernatori Gevin Nyusom esa “nafratning Kaliforniyada o‘rni yo‘q”ligini ta’kidladi.

Source: www.dw.com