Kongo Demokratik Respublikasi (KDR) futbol jamoasi Jahon chempionatiga tayyorgarlik doirasida Kinshasada o‘tkazilishi rejalashtirilgan uch kunlik yig‘in va muxlislar bilan xayrlashuv tadbirini Ebola epidemiyasi sababli bekor qildi.

Jamoa matbuot kotibi Jerri Kalemoning ma’lum qilishicha, Belgiyaning Lyej shahrida Daniya va Chiliga qarshi o‘rtoqlik uchrashuvlari rejadagidek o‘tkaziladi. Biroq Kinshasadagi bosqich bekor qilindi.

Ebola virusining Bundibugyo shtammi tarqalishi natijasida 130 dan ortiq odam vafot etgan va 600 ga yaqin gumon qilingan holatlar qayd etilgan. Jahon sog‘liqni saqlash tashkiloti vaziyatni xalqaro ahamiyatga molik favqulodda holat deb e’lon qildi.

KDR terma jamoasining barcha futbolchilari va fransiyalik murabbiy Sebastyan Desabr mamlakatdan tashqarida, asosan Fransiyada istiqomat qiladi. Jamoada KDRda bo‘lgan xodimlar esa yaqin kunlarda mamlakatni tark etadi.

FIFA vaziyatni kuzatayotganini va KDR futbol assotsiatsiyasi bilan tibbiy va xavfsizlik bo‘yicha maslahatlashayotganini bildirdi. AQSh Kasalliklarni nazorat qilish markazi esa KDR, Uganda va Janubiy Sudandan kelgan xorij fuqarolariga 30 kunlik kirish taqiqini joriy qildi.

AQSh rasmiysining so‘zlariga ko‘ra, KDR terma jamoasi a’zolari so‘nggi haftalarda Yevropada mashg‘ulot o‘tkazgani sababli taqiqdan ozod qilingan. Biroq 21 kun ichida KDRga qaytganlar karantin talablariga bo‘ysunadi.

KDR Jahon chempionatiga 1974 yildan beri ilk bor yo‘llanma oldi. Jamoa G guruhida Portugaliya, Kolumbiya va O‘zbekiston bilan to‘qnash keladi.

Source: www.aljazeera.com