Amerika Qo'shma Shtatlari Davlat departamenti Kongo Demokratik Respublikasi terma jamoasiga 2026 yilgi futbol bo'yicha jahon chempionatida ishtirok etish uchun istisno tariqasida ruxsat berdi. Bu haqda Al Jazeera va Match TV xabar berdi.

Avvalroq AQSh hukumati Ebola virusi tarqalishi xavfi tufayli Kongo Demokratik Respublikasi, Uganda va Janubiy Sudanda bo'lgan xorijliklarga kirishni taqiqlagan edi. Biroq, terma jamoa uchun maxsus istisno qilindi.

Davlat departamenti tushuntirishicha, jamoa hozirda Yevropada mashg'ulot o'tkazmoqda, shuning uchun ko'pchilik o'yinchilar sanitariya cheklovlariga tushmasligi mumkin. Agar o'yinchilar yaqinda Kongoda bo'lgan bo'lsa, ular qo'shimcha tibbiy ko'rikdan o'tkaziladi, jumladan test va karantin.

Istisno faqat o'yinchilar va rasmiy delegatsiyaga tegishli. Kongolik oddiy muxlislar uchun cheklovlar o'z kuchida qoladi.

19 may holatiga ko'ra, Kongo Demokratik Respublikasida 513 dan ortiq Ebola bilan kasallanish holati qayd etilgan, 131 kishi vafot etgan.

2026 yilgi jahon chempionatida Kongo DR terma jamoasi K guruhida O'zbekiston, Portugaliya va Kolumbiya bilan birga o'ynaydi. Birinchi o'yin 17 iyun kuni Texasda Portugaliyaga qarshi bo'ladi.

Bosh murabbiy Sebastyan Desabr jamoaning tayyorgarligi Yevropa va Xyustonda davom etayotganini, Kinishasada yig'in bosqichi sanitariya cheklovlari tufayli bekor qilinganini aytdi. FIFA sog'liqni saqlash organlari va Kongo futbol rasmiylari bilan yaqin aloqada ekanligini bildirdi.

Source: podrobno.uz