Mashhur amerikalik bokschi Floyd Mayweather Las Vegasda hashamatli soat sotib olish uchun soxta chek yozganlikda ayblanmoqda. Unga nisbatan ikki og‘ir jinoyat moddasi bo‘yicha ayblov e’lon qilingan.

Mayweatherning ishi bo‘yicha dastlabki sud majlisi dushanba kuni Las Vegas Justice Courtda bo‘lib o‘tdi. Bokschining o‘zi ishtirok etmagan bo‘lsa-da, uning nomidan advokat qatnashdi, deya xabar beradi Clark County prokuraturasi.

ESPN ma’lumotlariga ko‘ra, Mayweatherga nisbatan “qiymati 100 000 dollar va undan ortiq bo‘lgan o‘g‘irlik” hamda “qiymati 1 200 dollardan ortiq bo‘lgan firibgarlik maqsadida chek yozish” ayblovlari qo‘yilgan. Ish bo‘yicha navbatdagi sud majlisi sentabr oyida belgilangan.

49 yoshli Mayweather aprel oyida o‘g‘irlik va firibgarlik maqsadida chek yozishda ayblangan edi. Prokuratura ma’lumotlariga ko‘ra, 2024-yil dekabr oyida u Wells Fargo Bank orqali Gold and Beyond nomli hashamatli buyumlar do‘koniga 200 000 dollarlik chek yozgan, ammo hisobida yetarli mablag‘ bo‘lmagan.

Mayweatherning advokati va vakillari AP agentligining so‘roviga javob bermagan. Agar aybdor deb topilsa, firibgarlik moddasi bo‘yicha 1 yildan 4 yilgacha qamoq va 5 000 dollargacha jarima, o‘g‘irlik moddasi bo‘yicha esa 1 yildan 20 yilgacha qamoq va 15 000 dollargacha jarima kutmoqda.

Mayweather boshqa huquqiy muammolarga ham duch kelmoqda. U Nyu-Yorkda kvartira ijarasini to‘lamaganlikda sudlanib, bir qancha zargarlar bilan moliyaviy nizolarga aralashgan. Shuningdek, sobiq biznes menejeriga qarshi firibgarlik da’vosi bilan murojaat qilgan.

Besh vazn toifasida jahon chempioni bo‘lgan va 50-0 rekordiga ega Mayweather bu yil nafaqaga chiqqanini e’lon qilib, yozda professional boksga qaytishini ma’lum qilgan edi. U 27-iyun kuni Gretsiyaning Afina shahrida bo‘lib o‘tadigan “Battle of the Legends” jangida ishtirok etishi rejalashtirilgan edi.

Source: www.aljazeera.com