Londonning "West Ham United" klubi "Tottenham Hotspur"dan isroillik vinger Manor Solomonni dastlabki 5 million funt sterlingga sotib oldi. 27 yoshli futbolchi bilan tuzilgan shartnoma bonuslar bilan 7 million funtga yetishi mumkin.

Solomon faoliyati davomida "Shakhtar Donetsk" bilan ikki marta Ukraina chempionligini qo'lga kiritgan, Chempionlar Ligasida "Real Madrid" darvozasiga gol urgan. O'tgan mavsumda "Lids Yunayted"da 39 o'yinda 10 gol va 12 golli uzatma qayd etib, jamoaning chempionlikka erishishiga hissa qo'shgan.

Biroq futbolchining Isroilni qo'llab-quvvatlovchi chiqishlari ijtimoiy tarmoqlarda norozilikka sabab bo'lmoqda. 2023-yil oktabr oyida Falastin guruhlari hujumlaridan so'ng u Instagram'da "Isroil o'zini himoya qilish huquqiga ega" deb yozgan va "Isroil uchun ibodat qiling" degan chaqiriq bilan chiqqan.

G'azodagi genotsid paytida u falastinlik guruhlarni "o'z xalqini o'ldirib, Isroilni ayblashda" ayblagan. "All Eyes on Rafah" trendiga javoban esa "7-oktabrda ko'zlaringiz qayerda edi?" deb so'ragan.

"West Ham" muxlislari orasida bu transferga munosabat turlicha. Ba'zi muxlislar sportni siyosatdan ajratish kerakligini ta'kidlasa, boshqalari bu qaror jamoa ruhiga salbiy ta'sir ko'rsatishi mumkinligini aytmoqda. Klub rasmiylari hozircha bu borada izoh bermagan.

Solomonning Isroil armiyasidagi xizmati ham tanqidlarga sabab bo'lmoqda. U 2018-yilda harbiy tayyorgarlikdan o'tgan, biroq uning jangovar rolda qatnashgani haqida dalil yo'q. Falastin futbol assotsiatsiyasi ma'lumotlariga ko'ra, 2026-yil fevraliga qadar G'azo sport jamoasining 1007 a'zosi halok bo'lgan, jumladan 565 nafari futbolchi.

Source: www.aljazeera.com