Germaniyaning janubidagi Augsburg shahrida erta tongda noma’lum obyekt portladi. Politsiya ma’lumotlariga ko‘ra, portlash natijasida ikki kishi engil jarohat oldi, ularga akustik travma tashxisi qo‘yildi.

Hodisa shahar bosh temir yo‘l vokzali binosining o‘tish yo‘lagida sodir bo‘lgan. Portlash tufayli deraza oynalari shikastlangan. Politsiya vokzalni to‘liq yopib, barcha poyezdlar harakatini to‘xtatdi.

Mahalliy Augsburger Allgemeine gazetasining xabar berishicha, voqea joyida kriminal politsiya idorasi (LKA) xodimlari va portlovchi moddalarni zararsizlantirish roboti ishlamoqda. Tergovchilar hozircha portlash sabablari yuzasidan hech qanday ma’lumot bermagan.

Augsburg Myunxendan 55 kilometr g‘arbda joylashgan yirik transport tugunidir. Politsiya xodimlari voqeaga mahalliy vaqt bilan soat 5:00 atrofida javob bergan.

Shu bilan birga, Kyoln yaqinidagi Bergheim shahridagi elektr stansiyasida ham noodatiy hodisa yuz berdi. Seshanba kuni kechqurun stansiyada qisqa tutashuv sodir bo‘lib, bir nechta elektr uzatish liniyalari ishdan chiqdi.

Politsiya matbuot kotibining so‘zlariga ko‘ra, dastlabki tergov natijalariga ko‘ra, bu texnik nosozlik emas, balki qasddan qilingan jinoyat bo‘lishi mumkin. Hozircha zarar miqdori va gumonlanuvchilar haqida ma’lumot berilmagan.

Ayni paytda Sharqiy Brandenburgdagi Yanshvalde ko‘mir elektr stansiyasi yaqinida ham noma’lum shaxslar o‘ta yuqori kuchlanishli elektr uzatish liniyalariga qisqa tutashuv keltirishga urinishgan. Politsiya voqea joyida portlovchi qurilmalarni topib, hodisani sabotaj sifatida tergov qilmoqda.

Source: www.dw.com