Angliyaning “Liverpool” klubi 2027-yil 1-iyundan boshlab Turkiyaning “Turkish Airlines” aviakompaniyasi bilan 5 yillik homiylik shartnomasini imzoladi. Bu Anfield jamoasining 2010-yildan beri asosiy forma homiysi bo‘lgan “Standard Chartered” banki bilan 17 yillik hamkorlikni yakunlaydi.

Seshanba kuni e’lon qilingan kelishuv, ommaviy axborot vositalarining xabar berishicha, 300 million funt sterlingdan (405,78 million dollar) oshadi. Bu ko‘rsatkich “Liverpool”ni Angliya Premer-ligasining eng daromadli homiylik shartnomalaridan biriga ega klubga aylantiradi.

Aniq raqamlar tasdiqlanmagan bo‘lsa-da, bu bitim “Manchester United”ning 2024-yil avgustida “Qualcomm” bilan imzolagan forma homiylik shartnomasi daromadiga teng bo‘lishi kutilmoqda.

Klub bayonotiga ko‘ra, “Standard Chartered” “Liverpool”ning global hamkori sifatida qoladi, biroq “Turkish Airlines” asosiy homiy o‘rnini egallaydi. “Liverpool”ning tijoriy direktori Ben Latti shartnoma yuzasidan shunday dedi: ““Liverpool” formasining old qismi klub tarixida alohida o‘rin tutadi. “Turkish Airlines” xalqaro miqyosda tanilgan tashkilot bo‘lib, biz 2005-yildagi unutilmas xotiralar, ya’ni Istanbuldagi Chempionlar ligasi finalidagi ajoyib qaytish bilan mustahkamlangan poydevor asosida hamkorlikni boshlashni intiqlik bilan kutmoqdamiz.”

Bu shartnoma “Turkish Airlines”ning futbol homiylik portfelini yanada kengaytiradi. Aviakompaniya Chempionlar ligasining rasmiy hamkori va Turkiya terma jamoasining bosh homiysi hisoblanadi.

Fevral oyida “Liverpool” so‘nggi moliyaviy yil uchun 700 million funt sterlingdan (950 million dollar) ortiq rekord daromadni e’lon qilgan edi. Klub Deloitte Football Money League reytingida Premer-liganing eng yuqori o‘rindagi jamoasi bo‘ldi.

Aytish joizki, “Liverpool” 1979-yilda yaponiyalik “Hitachi” elektronika kompaniyasi formasida o‘z nomini aks ettirgan birinchi yirik ingliz professional futbol klubi edi.

Source: www.aljazeera.com