Buyuk Britaniya tashqi ishlar vaziri Ed Miliband Isroil tomonidan bosib olingan G‘arbiy Sohildagi noqonuniy turar-joylarga qarshi sanksiyalar joriy etilishini ma'lum qildi.

Miliband seshanba kuni parlamentda so‘zlagan nutqida Britaniya Isroil turar-joylaridan keladigan tovarlarga import taqiqini joriy etishini aytdi. Uning so‘zlariga ko‘ra, keng qamrovli sanksiyalar rejimi ham o‘rnatiladi.

Vazir ta'kidlashicha, Britaniya endi adolatsizlik va azob-uqubatlarni shunchaki “qoralab” qo‘ya olmaydi, balki turar-joylarning kengayishiga qarshi “harakat” qilishi kerak. “Bugun biz qo‘shimcha azob-uqubatlar va ikki davlat yechimining yo‘q qilinishiga guvoh bo‘lishdan bosh tortamiz”, dedi u.

AQSh Isroildagi elchisi orqali Britaniyaning sanksiya rejasini tanqid qilgan bo‘lsa, ikki isroillik vazir Britaniyaga qarshi choralar ko‘rishga chaqirdi. Miliband, shuningdek, Britaniyaning G‘arbiy Sohildagi ishg‘olni noqonuniy deb hisoblashini va Londonning fikricha, G‘arbiy Sohilning ayrim hududlarida falastinliklarga nisbatan “etnik tozalash” sodir bo‘layotganini aytdi.

Buyuk Britaniya va Isroil o‘rtasidagi yillik savdo hajmi £6 milliard ($8,12 mlrd)ni tashkil etadi, biroq sanksiyalarning ta'siri minimal bo‘lishi kutilmoqda, chunki Britaniyaning G‘arbiy Sohildagi turar-joylarda ishlab chiqarilgan tovarlarni Isroilning o‘zida ishlab chiqarilgan mahsulotlardan qanday ajratishi hozircha noaniq.

Source: www.aljazeera.com