AQShning Arizona shtati Feniks shahrida joylashgan Turning Point USA tashkilotining bosh qarorgohi oldiga o'rnatilgan marhum o'ng qanot faoli Charlz Kirkning haykali o'rnatilganidan bir necha kun o'tib buzib tashlandi. Tashkilotning operatsion direktori Tayler Bouyer yakshanba kuni bronza haykal va uning yonidagi lavha qizil bo'yoq bilan buzilganini ma'lum qildi.

Bouyer ijtimoiy tarmoqdagi sahifasida yozishicha, noma'lum shaxslar haykalning yuziga chizib, Iso va xoch tasvirini o'chirib, uning bo'yniga qizil bo'yoq sepgan. Bu voqea AQShda siyosiy qarama-qarshiliklar yanada kuchayib borayotgan bir paytda yuz berdi.

Haykal payshanba kuni Kirk vafot etganiga bir yil to'lishi munosabati bilan ochilgan edi. Kirk Turning Point tashkilotining asoschilaridan biri va AQSh prezidenti Donald Trampning yaqin tarafdori bo'lgan. U Yuta Valley universitetida talabalarga nutq so'zlayotganda otib o'ldirilgan edi.

Qotillikda ayblanayotgan Tayler Robinson o'tgan oy qotillik ayblovini tan olmagan va unga o'lim jazosi tahdid solmoqda. Feniks politsiyasi yakshanba kuni ertalab Turning Point qarorgohi oldidagi buzilgan yodgorlik haqida qo'ng'iroqlar kelganini tasdiqladi.

Turning Point vakillari buzg'unchilar haykalning bo'yniga ataylab bo'yoq sepganini, bu Kirk otilgan joy ekanligini ta'kidladi. Tashkilot haykalni tiklash va lavhalarni almashtirish niyatida ekanini, shuningdek, voqea aks etgan videolavhalarni o'rganib, huquq-tartibot idoralari bilan birgalikda aybdorlarni aniqlash ustida ishlayotganini ma'lum qildi.

Source: www.aljazeera.com