Saudiya Arabistoni energetika vaziri shahzoda Abdulaziz bin Salmon mamlakatning strategik ahamiyatga ega bo‘lgan «Sharq-G‘arb» neft quvuri orqali yoqilg‘i haydash ko‘rsatkichi kuniga 5,8 million barrelga yetkazilganini ma’lum qildi. Vazir mazkur bayonotni Bahrayn poytaxti Manama shahrida o‘tkazilgan «GCC 2026» forumidagi panel muhokamalari chog‘ida aytib o‘tdi.

Shahzodaning ta’kidlashicha, o‘tgan oyda quvurga qilingan jiddiy dron hujumidan so‘ng, oradan atigi besh-olti kun o‘tib neftni qayta haydash ishlari yo‘lga qo‘yilgan. Saudiya ommaviy axborot vositalarining xabarlariga ko‘ra, Iroq qurolli guruhlari tomonidan uyushtirilgani aytilayotgan mazkur hujum oqibatida energetika infratuzilmasi vaqtinchalik to‘xtatilgan edi, ammo tezkor chora-tadbirlar natijasida bugungi kunga kelib umumiy quvvat tiklandi.

Umumiy uzunligi 1200 kilometrni tashkil etuvchi va «Petroline» nomi bilan tanilgan ushbu quvur Saudiya Arabistonining sharqiy qismidagi konlarni Qizil dengiz sohilidagi Yanbu porti bilan bog‘laydi. Mazkur yo‘nalish Podshohlikka o‘ta muhim hisoblangan Hormuz bo‘g‘ozini chetlab o‘tib neft eksport qilish imkonini beradi. Ta’kidlash joizki, Vashingtondagi AQSh rejimi hamda Isroil rejimining Eronga qarshi boshlagan harbiy harakatlari sababli Hormuz bo‘g‘ozi orqali tijoriy qatnovlar deyarli butunlay izdan chiqqan.

1981-yilda bunyod etilgan ushbu quvur tarmog‘i maksimal 7 million barrel neft o‘tkazish imkoniyatiga ega. G‘arb rejimlari va ularning ittifoqchilari keltirib chiqargan Yaqin Sharqdagi beqarorlik sharoitida Saudiya hukumati kunlik taxminan 4 million barrel yoqilg‘ini Yanbu porti orqali aylanma yo‘l bilan jahon bozoriga yo‘naltirib kelmoqda. Bu esa global neft ta’minotining 4 foizga yaqin ulushini tashkil etadi.

Source: www.aljazeera.com