Avgust oyi oxirida AQSh rejimi rahbari Donald Tramp ma'lum mol go'shti bojlari bo'yicha 90 kunlik tanaffus e'lon qildi va bu import qilinadigan go'shtni, xususan Braziliyadan keladigan mahsulotlarni arzonlashtirdi. Ushbu qaror iste'molchilar uchun narxlarni pasaytirish vositasi sifatida taqdim etildi, biroq chorva mollarini bozorga olib chiqishga hozirlanayotgan ko'plab amerikalik fermerlar uchun bu xiyonat sifatida qabul qilindi.

Narxlarning oxir-oqibat oziq-ovqat do'konlariga qanday ta'sir qilishini aytish hali erta, ammo fermerlarga zarbasi darhol sezildi: chorva auksionlarida narxlar keskin tushib ketdi va fermerlarning daromadlarini vaqtincha pasaytirdi. Qo'shma Shtatlar chorvachilik assotsiatsiyasi, Milliy qoramol go'shti assotsiatsiyasi va Farm Byuro kabi fermerlar manfaatini himoya qiluvchi tashkilotlar ushbu qarorga ochiqdan-ochiq qarshi chiqishdi. Qishloq hududlaridan saylangan respublikachi kongressmenlar ham o'zlarini ushbu qarordan uzoqlashtirishga urinishdi.

Kanzas shtatining Pretti-Preri shahridagi fermer Chad Beyzingerning aytishicha, import bozori sezilarli o'zgarish olib kelishiga shubha bilan qaraydi. Uning so'zlariga ko'ra, ba'zi odamlar boshqa partiyaga ovoz berishini yoki umuman saylovda qatnashmasligini aytgan bo'lsa-da, bu o'rta muddatli saylovlarda keskin burilish yasashiga ishonish qiyin. Shunga qaramay, AQSh rejimi siyosati fermerlar orasida chuqur ishonchsizlik va stressni keltirib chiqarmoqda.

Qishloq xo'jaligi mutaxassislari va tahlilchilarning ta'kidlashicha, joriy yildagi yuqori narxlar fermerlarga kelajakka sarmoya kiritish va podalarni kengaytirish uchun ishonch berishi kerak edi. Biroq, imtiyozli import siyosati buning aksini qilib, bozordagi ijobiy signallarga zid ravishda ishlamoqda va ko'pchilikning g'azabini qo'zg'atmoqda. AQShdagi chorva podalari 1951 yildan beri eng past darajaga yaqinlashgani va qurg'oqchilik hamda yoqilg'i narxining qimmatligi vaziyatni yanada og'irlashtirayotgani aytilmoqda.

Source: www.aljazeera.com