Samarqandda mashhur Sherdor madrasasining birinchi restavratsiya bosqichi yakunlanishiga bag‘ishlangan tadbir bo‘lib o‘tdi. To‘liq restavratsiya 2028-yilda yakunlanadi. AQSh bu loyiha uchun 500 ming dollar ajratdi.

AQSh davlat kotibi o‘rinbosari Sara Rodjers rasmiy tadbirda so‘zga chiqib, “Biz sizning Amerikaga murojaat qilganingizdan xursandmiz”, dedi. Bu fond tomonidan O‘zbekistonga ajratilgan eng yirik grantdir.

Birinchi bosqichda Sherdor madrasasi fasadining bir qismi – kufiy yozuvi restavratsiya qilindi. Asosiy ishlar madrasa portali bilan bog‘liq.

Rodjers restavratsiyadan hayratda qolganini aytdi: “An’anaviy aralashma mozaikani yig‘ishda shu qadar mahorat bilan ishlatilganki, u deyarli choksiz ko‘rinadi. O‘zbekistonning milliy o‘ziga xosligi va tarixi uchun muhim bo‘lgan ish uchun Amerikani tanlagani ajoyib”.

Tadbirda AQSh elchisi Jonatan Xenik ham ishtirok etdi. “Amerika Sherdorni butun dunyo uchun saqlashda O‘zbekiston bilan birga bo‘lishdan mamnun”, dedi elchi.

Rodjersning ta’kidlashicha, portaldagi kufiy yozuvi o‘qib bo‘lmaydigan holatga kelgan. “Biz umumiy sivilizatsiya va kelajakka yo‘naltirilgan qadriyatlarimiz haqida ko‘p gapiramiz. Amerika ilg‘or tajriba va standartlarni olib keldi, o‘zbek ustalari esa o‘z bilimlarini qo‘shdi”, dedi u.

Delegatsiya restavratorlar bilan uchrashdi va Sherdor bo‘ylab sayohat qildi. Ikki tomonlama munosabatlar haqida so‘ralganda, Rodjers “C5+1 formatida O‘zbekiston rahbarligini kuzatishdan xursandmiz” dedi.

Sherdor madrasasi – XVII asrga oid islomiy ta’lim va memorial inshooti bo‘lib, Registon maydonidagi Ulug‘bek va Tillakori madrasalari bilan birgalikda me’moriy ansambl hosil qiladi. 2001-yilda YuNESKO Butunjahon merosi ro‘yxatiga kiritilgan.

Source: kun.uz