Shavkat Mirziyoyev “Qurilish sohasida natijaga yo‘naltirilgan boshqaruvni joriy etish va tarmoqdagi davlat xizmatlarini soddalashtirish chora-tadbirlari to‘g‘risida”gi Farmonni imzoladi.
Hujjat qurilish ruxsatnomalarini olishda aholi va tadbirkorlarning vaqt va moliyaviy xarajatlarini ikki baravargacha qisqartirish, shuningdek sun'iy intellektni joriy etish va inson omilini kamaytirishga qaratilgan.
2026-yil 1-sentabrdan boshlab respublika bo‘ylab yagona davlat xizmati – arxitektura-shaharsozlik talabini berish joriy etiladi. Raqamlashtirilgan bosh rejaga ega aholi punktlarida bunday talablar inson ishtirokisiz avtomatik shakllantiriladi.
2026-yil 1-iyuldan boshlab ob'ektlarni muhandislik-kommunikatsiya tarmoqlariga ulash “bitta ariza – bitta to‘lov – barcha ulanish nuqtalari” tamoyiliga o‘tkaziladi. Yil oxirigacha Toshkentda, 2027-yil oxirigacha esa boshqa hududlarda yuklamalar, zaxiralar va ulanish nuqtalari to‘g‘risidagi ma'lumotlar GIS formatiga o‘tkaziladi va “Raqamli hukumat” platformasiga integratsiya qilinadi. Raqamlashtirilgan aholi punktlarida ulanish uchun texnik shartlar to‘liq avtomatik ravishda beriladi.
2026-yil 1-sentabrdan boshlab Qurilish va uy-joy kommunal xo‘jaligi sohasida nazorat inspeksiyasi yangi ob'ektlarda videokameralarni o‘rnatishni majburiy qiladi: tadbirkorlar tomonidan qurilayotgan ko‘p qavatli uylar; III va IV toifadagi ijtimoiy soha ob'ektlari, mehmonxonalar, turistik, savdo va sanoat ob'ektlari; shuningdek qiymati 3 milliard so‘mdan ortiq bo‘lgan byudjet ob'ektlari (muhandislik-kommunikatsiya tarmoqlaridan tashqari). Inspeksiya, shuningdek, ijro hujjatlarini raqamlashtiradi va qog‘oz nusxalarini talab qilishni to‘xtatadi, hamda qurilish ruxsatnomasi va foydalanishga topshirish bo‘yicha arizalarni sun'iy intellekt orqali tahlil qilishni bosqichma-bosqich joriy etadi.
2026-yil 1-iyuldan boshlab yangi ob'ektlar bo‘yicha parallel qurilish (bir vaqtning o‘zida loyihalash va qurish) taqiqlanadi. Buning o‘rniga loyihani bosqichma-bosqich ishlab chiqish joriy etiladi. Istisno – tadbirkorlarning o‘z mablag‘lari va to‘g‘ridan-to‘g‘ri xorijiy investitsiyalar hisobidan moliyalashtiriladigan ob'ektlar (ko‘p qavatli uylardan tashqari). Byudjet ob'ektlari uchun bosqichma-bosqich qurilish faqat Prezident va Vazirlar Mahkamasining alohida qarorlari bilan ruxsat etiladi.
Inspeksiya, shuningdek, ko‘p qavatli uylarda kafolat muddati davomida nuqsonlarni bartaraf etish bo‘yicha ko‘rsatmalarni bajarmaydigan pudratchilar uchun jarima ballarini joriy etadi. O‘zboshimchalik bilan qurilish ustidan nazorat kuchaytiriladi: noqonuniy qurilgan ob'ektlarni tashqi muhandislik tarmoqlaridan (elektr, suv, yo‘llar) uzish, shuningdek mansabdor shaxslarning noqonuniy ruxsatnomalar uchun javobgarligini kuchaytirish.
Source: kun.uz