O‘zbekistonga Rossiyadan kelayotgan turistlar oqimi jadal sur’atda o‘sishda davom etmoqda. Turizm qo‘mitasi ma’lumotlariga ko‘ra, 2026 yilning birinchi besh oyida respublikaga 465,8 ming nafar Rossiya fuqarosi tashrif buyurgan. Bu o‘tgan yilning shu davriga nisbatan 30 foizdan ko‘proqdir – 2025 yilning yanvar-may oylarida bu ko‘rsatkich 334,3 ming kishini tashkil etgan edi.

Mutaxassislarning ta’kidlashicha, Rossiya O‘zbekiston uchun asosiy turistik bozorlardan biri bo‘lib qolmoqda. Turistlar sonining oshishi, ayniqsa, bayram kunlarida yaqqol namoyon bo‘ldi. Joriy yilning may oyidagi bayramlarda respublikaga 124 mingdan ortiq rossiyalik sayyoh kelgan bo‘lsa, 2025 yilda bu raqam 94,2 mingni tashkil etgan edi. Ya’ni, mehmonlar soni 30 ming nafardan ko‘proqqa oshgan.

Shuningdek, 2026 yil may oyidagi bayramlarda O‘zbekiston rossiyaliklar uchun xorijiy sayohatlar bo‘yicha eng mashhur yo‘nalishga aylandi. Mamlakat Turkiya va Belarusni ortda qoldirib, mavsumning asosiy hiti sifatida o‘z mavqeini mustahkamladi. Bu O‘zbekistonning turizm jozibadorligi ortib borayotganidan dalolat beradi.

Source: podrobno.uz