O‘zbekistonda muddati o‘tgan avtomobillarni utilizatsiya qilish tizimini yaratishga qaratilgan loyiha jamoatchilik muhokamasiga qo‘yildi. Hujjat transport vositalari va ularning qismlarini qayta ishlashga kompleks yondashuvni, shuningdek, 30 yoshdan oshgan avtomobil egalari uchun ekologik yig‘imni nazarda tutadi.

Loyihaga ko‘ra, mamlakatda transport vositalari va ularning qismlarini utilizatsiya qilishning shaffof tizimini yaratish, shuningdek, “Nol chiqindi” tamoyili bo‘yicha chiqindilarni qayta ishlashni rivojlantirish rejalashtirilgan.

Tizimni bosqichma-bosqich joriy etish taklif qilinmoqda: 2026 yildan boshlab M1 toifasidagi yengil avtomobillarni, 2027 yildan mikroavtobuslar, avtobuslar va yuk transportini, 2030 yildan esa barcha turdagi g‘ildirakli transport vositalarini qamrab olish ko‘zda tutilgan.

Loyihaning eng muhim normalaridan biri 2027 yil 1 yanvardan boshlab 30 yoshdan oshgan avtomobil egalari uchun yillik ekologik kompensatsiya joriy etish taklifidir. To‘lov miqdori 30 BHM (hozirda 12 million so‘mdan ortiq) etib belgilanishi mumkin.

Shuningdek, hujjat ekologik zararli deb topilgan transport vositalarini ishlatishni taqiqlashni nazarda tutadi. Tizimni ishlab chiqish va joriy etish bilan Ekologiya va iqlim o‘zgarishi qo‘mitasi huzuridagi Chiqindilarni boshqarish va aylanma iqtisodiyotni rivojlantirish agentligi hamda Raqamli texnologiyalar vazirligi shug‘ullanadi.

Loyiha bo‘yicha jamoatchilik muhokamasi 2026 yil 28 iyungacha davom etadi. Taklif va mulohazalar ko‘rib chiqilgandan so‘ng hujjat belgilangan tartibda tasdiqlash uchun kiritilishi mumkin.

Source: podrobno.uz