O‘zbekiston milliy futbol terma jamoasi Jahon chempionati saralash bosqichida Portugaliyaga 5:0 hisobida mag‘lub bo‘ldi. Uchrashuvdan so‘ng jamoa sardori Eldor Shomurodov, hujumchi Igor Sergeyev va himoyachi Rustam Ashurmatov Gazeta muxbiriga o‘z fikrlarini bildirdi.

Eldor Shomurodov muxlislardan yirik mag‘lubiyat uchun uzr so‘radi: “5:0 albatta juda katta hisob. Lekin borimizni berib o‘ynadik. Portugaliya kabi kuchli jamoaga qarshi o‘ynaganingda 100 foiz kuching bilan o‘ynashing ham kamlik qilishi mumkin. Omading ham kelishi kerak. Chunki raqib tarkibida individual va boshqa tomonlama juda kuchli o‘yinchilar bor.” Shomurodov Kongo DRga qarshi o‘yinda faqat g‘alaba haqida o‘ylashlarini ta’kidladi.

Igor Sergeyev mag‘lubiyat alamli ekanini aytdi: “5:0 ga yutqazganimiz alamli bo‘ldi. Bunday o‘yinlar kerak. Bu mag‘lubiyatdan xulosa chiqarib, oldinga siljishimiz kerak. Hozir biz emotsional holatdamiz, nimadir deyish qiyin.” U jamoa Kongoga qarshi bahsda g‘alaba uchun maydonga tushishini va Portugaliyani ham yengish mumkinligiga ishonishini bildirdi.

Rustam Ashurmatov himoya chizig‘i sifatida beshta gol o‘tkazib yuborish og‘ir zarba ekanini tan oldi: “5 ta gol bu juda ko‘p. Himoyachi sifatida buni hazm qilishim qiyin bo‘lyapti. Lekin hali uchinchi o‘yinimiz bor. Bu natijani unutishga maksimal harakat qilishimiz kerak.” U o‘tkazib yuborilgan gollarda himoyachilarning xatosi borligini va hakamning O‘zbekiston golini bekor qilish qarori bahsli bo‘lganini aytdi.

Bosh murabbiy Kannavaro mag‘lubiyat uchun javobgarlikni o‘z zimmasiga oldi va jamoa “matematika uyga jo‘natib yubormagunicha ishonishda davom etish lozim”ligini ta’kidladi. O‘zbekiston terma jamoasi guruh bosqichidagi so‘nggi o‘yinini 28-iyun kuni Kongo DRga qarshi o‘tkazadi.

Source: www.gazeta.uz