O‘zbekiston terma jamoasi va Angliyaning “Manchester City” klubi himoyachisi Abdukodir Husanov Forbes jurnalining 2026 yilgi Jahon chempionati ishtirokchilari orasidagi eng yuqori maosh oluvchi 48 nafar futbolchi reytingiga kiritildi. U yillik daromadi 6,2 million dollarni tashkil etgan holda 38-o‘rinni egalladi.

Forbes ma’lumotlariga ko‘ra, Husanovning yillik daromadining 5 million dollari futbol maoshi va bonuslar hissasiga to‘g‘ri keladi, qolgan 1,2 million dollari esa reklama shartnomalari, homiylik kelishuvlari va tijorat loyihalaridan olinadi. Uning hamkorlari orasida Puma bor, shuningdek, futbolchi o‘zining energetik ichimliklar brendini rivojlantirmoqda.

Reyting yetakchisi Krishtianu Ronaldu bo‘lib, uning yillik daromadi 280 million dollarni tashkil etadi. Shundan 230 millioni futbol shartnomasi, 50 millioni esa reklama va tijorat loyihalaridan keladi. Ikkinchi o‘rinda Lionel Messi (130 million dollar), uchinchi o‘rinda Kilian Mbappe (95 million dollar) joylashgan.

Husanovning “Manchester City”dagi jamoadoshi Erling Xoland 80 million dollar yillik daromad bilan to‘rtinchi o‘rinni egalladi. Forbes reytingi futbolchilarning so‘nggi 12 oydagi umumiy daromadini, jumladan, klub maoshlari, bonuslar, reklama shartnomalari va biznes loyihalarini hisobga olgan holda tuzilgan.

Shuningdek, Husanov Osiyoning eng qimmat futbolchisi deb tan olingan: Transfermarkt portali uni 50 million yevroga baholagan.

Source: podrobno.uz