Xatirchi tumani jinoyat ishlari bo‘yicha sudida 33 yoshli erkak 6 oylik o‘g‘lini shafqatsiz o‘ldirganlikda aybdor deb topilib, 15 yilga ozodlikdan mahrum etildi.

Fojiali voqea 2026 yil 9 yanvar kuni sodir bo‘lgan. Erkak dam olish uchun xonaga kirgan, biroq chaqaloqning yig‘isi uni g‘azablantirgan. Qarindoshlari ko‘z o‘ngida ota bolaning og‘ziga paypoq tiqib, qo‘llaridan ushlab silkitgan, natijada chaqaloqning boshi divanning yog‘och qismiga urilgan va klinik o‘lim yuz bergan.

Ona chaqaloqni shoshilinch kasalxonaga yetkazgan, biroq shifokorlarning sa’y-harakatlariga qaramay, bola 14 yanvar kuni soat 11:30 da vafot etgan.

Sud-tibbiy ekspertiza xulosasiga ko‘ra, o‘lim miya qattiq va yumshoq pardalari ostiga hamda miyachaga qon quyilishi, miya va o‘pka shishi, o‘tkir nafas yetishmovchiligi sababli yuz bergan.

Dastlab jinoyat ishi Jinoyat kodeksining 104-moddasi 1-qismi (Qasddan og‘ir tan jarohati yetkazish) bo‘yicha qo‘zg‘atilgan. Sud muhokamasi yakunida erkak Jinoyat kodeksining 97-moddasi 2-qismi “v” va “j” bandlarida (O‘ta shafqatsizlik bilan, aybdor uchun ojiz holatda bo‘lgan shaxsni qasddan o‘ldirish) nazarda tutilgan jinoyatni sodir etganlikda aybdor deb topildi.

Source: podrobno.uz