Toshkent aeroportida bojxona xodimlari Tailanddan kelgan ikki yo‘lovchining giyohvand moddalarni olib kirishga urinishini fosh etdi. Umumiy vazni qariyb 12 kilogrammni tashkil etgan.

Bojxona qo‘mitasi ma’lumotlariga ko‘ra, Bangkokdan kelgan 44 yoshli yo‘lovchi “yashil” koridordan o‘tmoqchi bo‘lgan, biroq xodimlarda shubha uyg‘ongan. Qo‘l yuki va bagajini tekshirish chog‘ida 4,8 kilogrammdan ortiq marixuana topilgan.

Yana bir holat Pxuketdan kelgan yo‘lovchi bilan bog‘liq. Qo‘shni davlatning 19 yoshli fuqarosining bagajida quruq sut solingan paketlar bojxona xodimlarining e’tiborini tortgan. Bojxona laboratoriyasi ekspertizasi 10 paket ichida quruq sut emas, balki 7 kilogramm 180 gramm og‘irlikdagi sintetik giyohvand modda – mefedron borligini aniqlagan.

Qo‘mita ma’lumotlariga ko‘ra, yo‘lovchi ushbu moddani Telegram orqali tanishgan noma’lum shaxsning ko‘rsatmasi bilan 1000 dollar evaziga Toshkentga yetkazishi kerak bo‘lgan. Ikkala holat bo‘yicha jinoiy ish qo‘zg‘atilgan.

Bojxona qo‘mitasi qo‘shimcha qilishicha, 2026 yilning birinchi yarmida giyohvand moddalarni noqonuniy olib kirish va muomalaga oid 400 dan ortiq holat aniqlandi. Jami 1,76 tonnaga yaqin taqiqlangan moddalar musodara qilindi.

Avvalroq Toshkentdagi “Quyliq” bozori yonida huquq-tartibot xodimlari afyun va gashish kabi og‘ir giyohvand moddalarning katta partiyasini topib, musodara qilgani xabar qilingan edi.

Source: podrobno.uz