O'zbekiston Prezidenti Shavkat Mirziyoyev Andijon viloyatiga tashrifi chog'ida "Andijon-Xuanya" xalqaro texnikumi faoliyati bilan yaqindan tanishdi. Ushbu ta'lim muassasasi Andijon tumanidagi "Ipak yo'li" sanoat zonasida joylashgan bo'lib, xorijiy investitsiyalar hisobidan barpo etilgan.

Prezident matbuot xizmatining xabar berishicha, texnikum to'qimachilik, mashinasozlik va elektrotexnika korxonalari uchun malakali kadrlar tayyorlashga ixtisoslashgan. Loyihaning umumiy qiymati 15 million dollarni tashkil etadi va bu yerda 150 ta ish o'rni yaratilgan. To'rt gektar maydonda qurilgan o'quv binosi besh ming nafar o'quvchini qabul qilishga mo'ljallangan.

Texnikumda dual ta'lim tizimi joriy etilgan bo'lib, o'quvchilar nazariy bilimlarni auditoriyalarda o'rganadilar, amaliyotni esa sanoat zonasidagi yirik korxonalarda o'taydilar. Muassasa joriy yilning iyun oyida ish boshlagan va hozirda 210 nafar talaba tahsil olmoqda. Kelgusi bosqichda yotoqxona, laboratoriya binosi, sport maydonchasi va oshxona qurish rejalashtirilgan.

2030 yilga borib har yili qabul qilinadigan o'quvchilar sonini 1800 nafarga, umumiy talabalar sonini esa to'rt ming nafarga yetkazish ko'zda tutilgan. Ta'lim yo'nalishlari soni 20 taga ko'payadi. Prezident texnikumdagi sharoitlar bilan tanishib, yoshlar va investor bilan suhbatlashdi.

Avvalroq Andijon viloyatida 206 ta yangi investitsiya loyihasi qurilishi boshlangani haqida xabar berilgan edi. Ularning ishga tushirilish marosimida Prezident Shavkat Mirziyoyev ishtirok etib, loyihalarga ramziy start bergan edi.

Source: podrobno.uz