O‘zbekistonda plastik, shisha va alyuminiy idishlarni qabul qiluvchi fandomatlar o‘rnatila boshlandi. Har bir topshirilgan butilka yoki banka uchun 150 so‘m olish yoki bu summani xayriyaga yo‘naltirish mumkin.

Pilot loyihani Chiqindilarni boshqarish va sirkulyar iqtisodiyotni rivojlantirish agentligi Norvegiyaning Tomra kompaniyasi bilan birgalikda ishga tushirdi. Loyihaning maqsadi — chiqindilarni alohida yig‘ishni soddalashtirish va qayta ishlashga yuboriladigan idishlar hajmini oshirish.

Idishlarni maxsus fandomat orqali topshirish mumkin. Har bir qabul qilingan idish uchun foydalanuvchiga 150 so‘m hisoblanadi. Pulni Click elektron hamyoniga olish mumkin. Shuningdek, hisoblangan summani xayriyaga yo‘naltirish imkoniyati ham mavjud — yig‘ilgan idishlarni sotishdan tushgan mablag‘ xayriya loyihalari va daraxt ekishga sarflanadi.

Fandomatlar idishlarni oddiy maishiy chiqindilardan alohida qabul qiladi. Yig‘ilgandan so‘ng ular saralanadi va qayta ishlashga yuboriladi. Olingan xomashyodan keyinchalik yangi mahsulotlar ishlab chiqarish mumkin.

Loyiha, shuningdek, aholini chiqindilarni alohida yig‘ishga o‘rgatish va ishlatilgan o‘ramlarni boshqa chiqindilar bilan birga tashlamasdan, qayta ishlashga topshirish mumkinligini ko‘rsatishga qaratilgan.

Agar pilot muvaffaqiyatli bo‘lsa, avtomatlar bosqichma-bosqich odamlar ko‘p to‘planadigan joylarda va mamlakat hududlarida o‘rnatiladi.

Avvalroq Toshkent va Samarqandda plastik idishlarni qabul qiluvchi fandomatlar o‘rnatilishi haqida xabar berilgan edi. Buning evaziga chek yoki oziq-ovqat mahsulotlari uchun ballar berish rejalashtirilgan edi.

Source: podrobno.uz