Toshkentda 1-sentabrdan 22-sentabrgacha bo‘lgan davrda jamoat transportida yo‘l haqini to‘lamagan yo‘lovchilarga nisbatan 14 ming 50 ta ma’muriy bayonnoma rasmiylashtirildi. Bu ko‘rsatkich avgust oyi natijalaridan 8 ming 494 nafarga, ya’ni 153 foizga ko‘pdir.

Ma’lumotlarga ko‘ra, avgust oyida jami 5 ming 556 nafar yo‘lovchi chiptasiz yurgani uchun javobgarlikka tortilgan bo‘lsa, sentabrning dastlabki uch haftasidayoq bu raqam sezilarli darajada oshgan. Transport vazirligi matbuot xizmatining ta’kidlashicha, bunday keskin o‘sish nazorat ishlarining kuchaytirilgani bilan bog‘liq.

Poytaxt jamoat transportida yo‘l haqini o‘z vaqtida to‘lash bo‘yicha tushuntirish va nazorat ishlarini “Toshkent shahar yo‘lovchi tashish monitoringi va nazorati” davlat muassasasi mutaxassislari olib bormoqda. Tadbirlar to‘lov intizomini mustahkamlash va barcha shahar yo‘nalishlarida tartibni ta’minlashga qaratilgan.

Nazoratchilar tomonidan o‘tkazilayotgan reydlar natijasida chiptasiz yo‘lovchilarga nisbatan ma’muriy choralar ko‘rilmoqda. Rasmiylar bu ishlarni tizimli davom ettirish niyatida ekanliklarini bildirishmoqda.

Eslatib o‘tamiz, avvalroq Toshkentda jamoat transportida to‘lovsiz yurish holatlariga qarshi kurashish maqsadida maxsus nazorat guruhlari tuzilgan edi. Mutaxassislar yo‘lovchilarni chipta yoki transport kartasidan foydalanishga chaqirmoqda.

Source: podrobno.uz